داعش دێ بەرێ خوە دەتە ڤان دو وەلاتان
ئەڤرۆ نیوز:
پشتی سەرکەڤتنا ھێزێن کوردی ل ھەمبەر داعشێ و ئازادکرنا شەنگالێ و شکەستنا وێ ل رۆژئاڤایێ کوردستانێ نھا رێکخستنا تیرۆرست ل ھەرێما سیرتێ یا لیبیایێ خوە بجە دکەت و ژ ئەندام و ئالیگرێن خوە دخوازیت بەرێ خوە بدەنە لیبیایێ و ژ نھا ڤە دەست ب ھێرشا دەڤەرێن نێزیکی بنگەھێن پەترۆلێ کریە و نھا 5 ھزار چەکدارێن خوە ل وێ دەڤەرێ ھەنە.
حوکمەتا لیبیا دو نامێن جودا بۆ ھەڤپەیمانیا نێڤدەولەتی و روسیا شاندینە و د نامێن خوە دا حوکمەتا لیبیایێ داخواز ژ جڤاتا نێڤدەولەتی ب تایبەتی ژی ژ ئەمریکا و روسیا کریە کو ژ نھا ڤە ھاریکاریا وان بکەن دا کو داعش خوە ب تەمامی بجە نەکەت و ئاشکرا ژی کریە کو نەشێن دەستھەلاتداریێ ل سەر ھەموو ئاخا لیبیایێ بکەن و یەکگرتنەکا بھێز د وەلاتێ وان دا دروست نەبوویە و بۆ ڤێ چەندێ ژی دەلیڤا بھێزبوونا داعشێ ھەیە.
عەبدوللا ئەلسانی سەرۆک وەزیرێن لیبیایێ ھەروەسا د کۆنگرەکێ رۆژنامەڤانی دا ژی ل پایتەختێ وەلاتێ خوە راگەھاند کو وی دو نامە ژ ئەمریکا و ھەڤپەیمانێن وێ و ژ روسیا را شاندینە و دیار کر مەترسیەکا گەلەک مەزن ل سەر وەلاتێ وی ھەیە و گۆت: (ل دووڤ زانیاریێن گەھشتنە دەستێ مە نھا نێزیکی پێنج ھزار چەکدارێن داعشێ ل دەوروبەرێن باژێرێ سیرتێ بجە بووینە و ھژمارەک زێدە بەرپرسێن وێ ژ عیراقێ و سووریێ ھاتینە ئاخا مە و رۆژ ب رۆژێ ھێرشێن وێ بەرفرەھتر دبن و ژ بەر پارچەبوونا دەستھەلاتێ و یەک نە گرتنا ھێزێن سەربازی نھا مەترسیەکا مەزن ھەیە).
ھەروەسا دێیڤید کۆکبورن رۆژنامەڤانێ ناڤدار یێ بریتانی ژی د شرۆڤەکرنا شەرێ ل دژی داعشێ و رەوشا داوی یا ل رۆژھەلاتێ ناڤین راگەھاند کو ب رەنگەکی بەرچاڤ داعش ل عیراقێ و سووریێ بەر ب شکەستنەکا مەزن ڤە دچیت و دخوازیت دەڤەرەکا یەدەک ژ نھا ڤە بۆ خوە دروست بکەت و د رەوشا نھا دا دەڤەرا ھەری گونجای بۆ بجھبوونا داعشێ وەلاتێ لیبیایە و لیبیا ھەتا نھا ژی نەشیایە دەولەتەکا یەکگرتی و دەستھەلاتەکا بھێز و سۆپایەکی نەتەوی دروست بکەت و گۆت: (ھەکە ھەڤپەیمانیا نێڤدەولەتی و روسیا ژ دل دخوازن داعشێ ژ ناڤ ببەن دڤێت پێکڤە نەخشێ تێکۆشینەکا بەرفرەە ئامادە بکەن ھەکە نە ئەڤرۆ ل سووریێ و عیراقێ داعش بھێتە شکاندن ژی دشێت ل لیبیا و دەشتا مسرێ بنگەھەکێ نوو دروست بکەت کو ژ نھا ڤە ھژمارەک زێدە چەکدارێن خوە ل مسرێ و لیبیایێ بجە کرینە).
رۆژنامەڤانێ بریتانی ھەروەسا دیار ژی کریە کو ھەکە داعش و قاعیدە ل لیبیا و دەڤەرێن مسرێ بجە ببن دێ مەترسیەکا گەلەک مەزن ل سەر ئورۆپا دروست کەن و وەک جۆگرافیا ژی گەلەک نێزیکی ئورۆپا دبن و گۆت: (ل دووڤ زانیاریێن ل بەر دەستێ من و داخۆیانیێن حوکمەتا لیبیا و وەزیرێ پاراستنا مسرێ د رەوشا نھا دا نێزیکی ١٢ ھزار چەکدارێن داعشێ و ھەشت ھزار چەکدارێن قاعیدە ل ھەردو وەلاتان بجە بووینە و ل مسرێ رۆژ ب رۆژێ دەستھەلاتا خوە ل دەشتا سینا و ل لیبیا ژی ل ھەرێما سێرتێ بەرفرەھتر دکەن و ئەو یەک مەترسیەکا گەلەک مەزنە ل سەر رۆژھەلاتا ناڤین، ئەفریقیا و ب تایبەت ژی ئورۆپا).
کۆکبورنی د پشکەکا دی یا شیرۆڤا خوە دا بەحسێ شکەستنا داعشێ ل شەنگالێ و رۆژئاڤایێ کوردستانێ ژی دکەت و رادگەھینیت کو ھێزێن کوردی ب وێرەکی و ھزرا نەتەوی شیان سەرکەڤتنێ ل ھەمبەر داعشێ تۆمار بکەن لێ نە ل سووریێ و نە ژی ل لیبیایێ ھێزەکا یەکگرتی یا ب ھێز و خوەدان باوەر وەک یا کوردان نینە و بۆ ڤێ چەندێ ژی دەلیڤا بھێزبوونا داعشێ و قاعیدە ل ڤان ھەردو وەلاتان زێدەترە و گۆت: (ھەموو ڤەکۆلین و زانیاریێن ھەوالگیریێ ژی گۆتنێن من پشتراست دکەن کو داعش و قاعیدە ژ عیراقێ و سووریێ زێدەتر نھا دخوازن خوە ل لیبیایێ و عیراقێ بجە کەن، بەلێ ئەڤ ئاخڤتنا من ناھێتە وێ واتەیێ کو ھەردو رێکخستنێن تیرۆرست دێ وەسا ب ئاسانی خوە ژ عیراقێ و سووریێ ڤەکێشن، لێ ئەو یەک گەلەک ئاشکرایە کو دخوازن دەستھەلاتا خوە بەرفرەھتر بکەن و بۆ وان جھێن ھەری گونجای لیبیا و مسرە، ژ خوە ل نیجێریا، چاد، کامیرون و سۆمالی کۆمێن دی یێن تیرۆرست ژی گرێدانا خوە بۆ داعشێ و قاعیدە بەری نھا دوپات کرینە، ژ بەر ڤێ چەندێ ژی بەری کو درەنگ بکەڤیت دڤێت نەخشێ ژناڤبرنا تیرۆرێ ببیتە نەخشەکێ جیھانی و جیھان پێکڤە د ناڤ تێکۆشینا ژناڤبرنا رێکخستنێن تیرۆرست دا بن).