داعش دەست ب کوشتنا وەلاتیێن سڤیل موختارێن مووسل کریە
ئەڤرۆ، رەمەزان ھەرنی:
ئەفسەرەکێ کورد ل سوپایێ عیراقێ ئاشکرا کر کو ھەبوونا رێژەکا مەزن یا ھێزێن چەکدار ل عیراقێ بوویە مەترسی بۆ سەر ژیانا وەلاتیان و بەردەوام کریارێن تیرورستی دھێنە ئەنجامدان ڤێ چەندێ ژی ترس ل دەف وەلاتیان پەیداکریە و لڤینێن تیرۆرستێن داعش ل مووسل و دەوروبەرێن وێ زێدەبووینە.
موقەدەم ئەمین شێخانی، ئەفسەرێ کورد ل سوپایێ عیراقێ بۆ ئەڤرۆ نیوز دیار کر کو رۆژ بۆ رۆژێ مەترسی ل سەر ژیانا وەلاتیا دروست دبیت ل عیراقێ و نوکە داعش تایبەت ب شەڤ دەست ب کوشتنا وەلاتیێن سڤیل و موختارێن مووسل و دەوروبەران کریە و گۆت: “د دەمێ ٣٠ رۆژێن بۆری دا نێزیکی ٢٠ کەسان ل مووسل و دەوروبەرێن وێ ب دەستێن تیرۆرستێن داعش ھاتینە کوشتن”.
ناڤھاتی ئاماژە دا وێ چەندێ کو ل دەڤەرا شەرگات چەکدارێن داعش تەقە ل سوپایێ عیراقێ کریە ھێزا پالپشت پشتەڤانیا ھێزێن عیراقێ کریە و ترۆمبێل ھاتینە پەقاندن، ژبەر ترسا داعش رۆژانە وەلاتی ژ مووسل دووبارە ئاوارە دبنەڤە د ناڤ کەمپان دا ئاکنجی دبن.
