داعش ل حەسەکێ تووشی شکەستنەکا مەزن ھات
ئەڤرۆ نیوز:
محەمەد حەمید چاڤدێرێ سیاسی یێ رۆژئاڤایێ کوردستانێ بۆ رۆژناما ئەڤرۆ دیار کر کو ھێزێن سووریا یا دیموکراتیک ب ھاریکاریا ھێزێن ھەڤپەیمانان شیانە د ماوەیێ چەند رۆژان دا ٣٦ گوندێن سەر ب پارێزگەھا حەسەکێ ژ دەستێ تیرۆرستێن داعشێ قورتال بکەن و دربەکێ مەزن ل وێ رێکخراوا تیرۆرستی بدەن و گۆت: (ل گۆر زانیاریێن گەھشتینە من ھێزێن سووریا یا دیموکراتیک ب پشتەڤانیا ھێزێن ھەڤپەیمانان شیاینە نێزیکی ٣٥٠ کیلۆمیترێن سێجا ژ دەستێ داعشێ ئازاد بکەن و ئەو یەک پێشڤەچوونەک گەلەک مەزنە و گەلەک گوند ئازاد بووینە و وێ یەکێ کاریگەریەکا گەلەک باش ل مۆرالا خەلکی کریە و ھەروەسا گەلەک ئەندامێن داعشێ پشتی شکەستنا ل حەسەکێ دەست ژ وێ رێکخراوێ بەرداینە).
ناڤھاتی د بەردەوامیا ئاخڤتنا خوە دا ئەو یەک ژی راگەھاند کو ھێزێن ھەڤپەیمانان ب تایبەتی ژی ئەمریکا پشتەڤانیەکا باش ددەتە ھێزێن سووریا یا دیموکراتیک و وان ژی ھەتا نھا سەلماندینە کو دشێن دربێن مەزن ل داعشێ بدەن، ئازادکرنا ٣٦ گوندێن سەر ب پارێزگەھا حەسەکێ ڤە پێنگاڤەک گرنگ بوو و ل گۆر زانیاریان د شەرێ ئازادکرنا وان گوندان دا ١٩٦ ئەندامێن رێکخراوا تیرۆرستی یا داعشێ ھاتینە کوشتن و ١٣ چەکدارێن لەشکرێ سووریا یا دیموکراتیک ژی جانێ خوە ژ دەست داینە و گۆت: (پشتی شکەستنا داعشێ ل وان گوندان چەکدارێن رێکخراوا تیرۆرستی یا داعشێ ھێرشی گوندێ ئەتشان یێ سەر ب پارێزگەھا حەسەکێ کرن و د ئەنجاما ھێرشا وان دا سێ وەلاتیێن سڤیل گیانێ خوە ژ دەست دان و پشتی وێ ھێرشێ ھێزێن سووریا یا دیموکراتیک ھێرشی داعشێ کرن و د دەمەکێ کورت دا ئەو گوند ژی ژ دەستێ تیرۆرستان ئازاد کرن).
ل ئالیێ دی پشتی کو بەرپرسەکێ کۆچکا سپی یا ئەمریکی راگەھاندی کو ئەو ئێدی ب چو رەنگەکێ پشتەڤانیێ ل یەکینەیێن پاراستنا گەل ناکەن، ئەو یەک بۆ ئەگەر کو تورکیا کەیفخوەشیا خوە ل ھەمبەر وێ پێنگاڤێ نیشا بدەت و وەک سەرکەڤتنەکا مەزن بۆ خوە ببینیت و جێگرێ سەرۆک وەزیرێن تورکیا نومان کورتولموش ژی بۆ دەزگەھێن راگەھاندنا تورکیا دیار کر کو ژ ئەنجاما گەفێن تورکیا ئەمریکا نەچار بوو کو سیاسەتا خوە ل ھەمبەر یەکینەیێن پاراستنا گەل ل سووریایێ بدەتە گوھۆرین و ئەو یەک سەرکەڤتنەکا مەزنە بۆ تورکیا.
ل ئالیێ بسپۆرێن سیاسی یێن ئەمریکی دیار دکەن کو داخۆیانیا کۆچکا سپی تنێ بۆ ئارامکرنا رەوشا ئالۆز یا د ناڤبەرا تورکیا و یەکینەیێن پاراستنا گەل دا بوویە، چونکو ئەمریکا باش دزانیت نھا تنێ ھێزێن کوردی ل دژی داعشێ شەری دکەن و جھێ باوەریێ نە ھێزا پێشمەرگە و شەرڤانێن کوردن و ژ بەر ھندێ ژی ئەمریکا ب چو رەنگەکێ دەستان ژ ھاریکاری کرنا شەرڤانێن کورد ل رۆژئاڤایێ کوردستانێ بەرنادەت.
