داعش و ئەلنوسرا پێکڤە ھێرشی کوردان دکەن
ئەڤرۆ نيوز:
سەلاحەدین سورو چاڤدێرێ سیاسی یێ کورد بۆ ئاژانسا نوڤوستی یا نووچەیان دیار کریە کو بەری نھا د ناڤبەرا داعشێ و جەبھەت ئەلنوسرا دا ناکۆکیێن مەزن ھەبوون و وان گەلەک جاران ژی شەرێ ھەڤدو دکرن، لێ پشتی کو ھێزێ کوردی شیان ل رۆژئاڤایێ کوردستانێ دربێن مەزن ل داعشێ بدەن و گەلەک دەڤەر ژ دەستێ وان ھاتنە دەرخستن نھا داعش و ئەلنوسرا شەرێ ھەڤدو ناکەن و ل عەزاز و حەلەب و گەلەک دەڤەرێن دیتر پێکڤە ھێرشی کوردان دکەن و گۆت: (ئەو ھەر دو رێکخراوێن تیرۆرستی چو جیاوازیەکە ناکەنە ناڤبەرا چەکداران و کەسێن مەدەنی و دەمێ کو ھێرشی گوندێن کوردان دکەن ژن و زارۆیان ژی دکوژن و ژ بەر ھندێ ژی دڤێت ھێزێن کوردی ژی ل رۆژئاڤایێ کوردستانێ ئێکەتیا خوە دروست بکەن و پێکڤە ل دژی تیرۆرێ شەری بکەن).
ناڤھاتی دیار کریە کو د شەرێ ل گەل وان تیرۆرستان ھەتا نھا ب سەدان وەلاتیێن سڤیل یێن رۆژئاڤایێ کوردستانێ گیانێ خوە ژ دەست داینە و ب ھزاران ئەندامێن وان رێکخراوێن تیرۆرست ژی ب دەستێ کوردان ھاتینە کوشتن و ژ بەر ھندێ ژی ئەڤرۆکە ئەرکێ جڤاتا نێڤدوەلەتی یە کو ل سووریێ و عیراقێ ھاریکاریا کوردان بکەن.
