داعش و حەشدا شەعبی بزاڤێن ئالۆزکرنا رەوشا کەرکووکێ دکەن
ئه‌ڤرۆ نيوز:
داعش و حەشدا شەعبی گرانیا چالاکیێن خوە ئێخستیە دەڤەرێن کوردستانیێن دەرڤەی ئیدارەیا حوکمەتا ھەرێما کوردستانێ و کادرەکێ پێشکەفتیێ پارتی ژی ل کەرکووکێ دبێژیت، ل سنورێ کەرکووکێ رەڤاندنا وەلاتیان زێدەبوویە و ھندەک لایەن دخوازن رەوشا پارێزگەھا کەرکووکێ ئالۆز بکەن.
ھەلمەت حەساری، کادرێ پێشکەفتیێ پارتی دیموکراتی کوردستان ل کەرکووکێ بۆ رۆژناما ئەڤرۆ گۆت” ئەڤە ماوەکە دیاردەیا رەڤاندن و ھێرشکرنە سەر وەلاتیان و تاوانێن جودا ل سنورێ پارێزگەھا کەرکووکێ زێدەکریە و ئەگەرێ زێدەبوونا ئەڤان تاوانانژی بۆڤێ چەندێ ڤەدگەڕیت ھندەک لایەن دخوازن رەوشا کەرکووکێ و دەڤەرێن کوردستانی ئالۆزبکەن، ب ئەنجامدانا ئەڤان تاوانێن ھوڤانە تەناھیا دەڤەرێ نەھێلن، چونکە ئەف لایەنژی باش ڤێ راستیێ دزانن کو ھێزێن پێشمەرگە باژێڕێ کەرکووکێ دپارێزن و وی دەمێ پێشمەرگە ھاتیە سنورێ کەرکووکێ دەڤەر تەنابویە و ژلایێ ئەمنی ڤە زۆر بەرەف پێشڤەچوویە، ھەتا رادەیەکێ زۆر ئارامی کەفتیە باژێڕی و سنورێ پارێزگەھێ.
حەسار دیارکر ژى كو ل ڤێ دوماھیێ تیرۆرستێن داعش ل سنورێ کەرکووکێ و خورماتو ھێرشێن خوە زێدەکرینە و دەست ب لڤینانکریە، ئەڤە سەرەرای ڤێ چەندێ گروپێن حەشدا شەعبی و شەعدا نیشتیمانی بزاڤان دکەن تاوانان ل کەرکووکێ ئەنجامبدەن بڤێ ئێکێ بێژنە خەلکی کوردا و دەزگەھێن ئەمنی شیانێن پاراستنا رەوشا ئەمنی نەماینە، ھەر بەری چەند رۆژان ھێزێن ئەمنی دەست دانا سەر تڕۆمبێلەکێ کو بۆمبەکا ڤەنایی تێدابو پشتی ڤەکۆلینێ دەرکەفت شوفێرێ تڕۆمبێلێ چەکدارێ حەشدا نیشیتمانی بو لبەر ئەڤێ تڕۆمبێلا بۆمبەکری دناڤا سەنتەرێ باژێڕێ کەرکووکێ پەقینیت، حەشدا شەعبی بھەمانشێوە ئەگەر وەکی قەزا خورماتوو دەستێ وانا بچیت و دەلیڤە ھەبیت دێ تاوانێن مەزن ئەنجامبدەن.
ژ لایێ خۆڤەژی کەمال ئیبراھیم، بەرپرسێ لیژنا ناوچا قەرەتە یا پارتی دیموکراتی کوردستان بۆ رۆژناما ئەڤرۆ گۆت” رەوشا ناحیا قەرەتە یا سەر ب قەزا خانەقین ژی ئالۆز بوویە و ڤێ دوماھیێ چەکدارێن داعش ھاتینە دەڤەرێ و ھەتا نوکە چەندین تاوانان ئەنجامداینە، بتایبەتی ل گوندێن عەرەب تێدا، ھەتا چەندین جارا وەلاتی ھاتینە رەڤاندن و ھێرشی سەر حەشدا شەعبی کریە ل دەڤەرێ، بەری نوکە سنێلەکی خوە کەمەرەکا بۆمبەکری بخۆڤە گرێدابو لبەر ناڤا بازاڕی خۆ پەقینیت بەلێ ژلایێ پۆلیسانڤە ھاتە کوشتن بەری بازاڕی بکەتە ئامانج، زۆر جارا دچنە سەر گوندێن دەوروبەر ئەگەر ئەو بزانن کەسەک دژی وانە ئێکسەر د کوژن یانژی دڕەڤین.
