داعش ژ ئیرانێ فێری سەربڕین و کوشتنێ بوویە
دارا ناتق ئەندامێ سەرکردایەتیا پارتی دیموکراتی کوردستان/ ئیران د بەرناما تەوەرێ گەرم یا رادیویا دھۆکێ دیار کر کو دەمێ کۆمارا ئیسلامی یا ئیرانێ ھاتیە سەر کار وان ژی وێ دەمێ جیھاد ل دژی کوردان راگەھاند و ب ھزاران ژن و زارۆک و خەلکێ مەدەنی ب دەستێ وێ رژێمێ ھاتنە کوشتن، ب دەھان خەلک ل ناڤ کۆلانان ھاتنە گوللەباران کرن، وان سەرێ ب دەھان ژن و زارۆکێ کورد برین و گۆت: “یا نھا داعش دکەت د بنەمایێ خوە دا ئیرانێ سیە سال بەرێ ل دژی کوردان کریە، دەستھەلاتا ئیرانێ ل سەر بنەمایێ ھشکباوەریا ئایینی ھاتە ئاڤاکرن و یا نھا داعش دکەت ژی ھەروەسایە”.
ناڤھاتی ئەو یەک ژی دیار کر کو ئەزموونێن ل جیھانێ نیشا ددەن کو ھێزێن ھشکباوەر چو دەمەکێ نەشێن خوە ل سەر پیان رابگرن و ئیرانێ ژی پاشێ ئەو روودان ھەموو ڤەشارتن و راگەھاندنا کوردی ژی وی دەمی د ئاستێ نھا دا نەبوو کو بشێت کریارێن ئیرانێ بۆ جیھانێ ئاشکرا بکەت.
