داقوق: نه‌هـ ئه‌ندامێن خێزانه‌كێ ب ده‌ستدرێژيا گوله‌يان هاتنه كوشتن
ئه‌ڤرۆ نيوز:
ده‌مژمێر 11:00 يا شه‌ڤا بۆرى ل ده‌مێ ڤه‌گه‌ريانێ ژ مێڤانداريه‌كێ 10 كه‌سێن خێزانه‌كێ كه‌فتنه به‌ر ده‌ستدرێژيا گوله‌يان و د ئه‌نجام دا نه‌هـ كه‌س ژ خێزانه‌كێ هاتنه كوشتن و زارۆيه‌كێ دو سالى ژى ب بريندارى رزگار بوو.
ئه‌ڤ خێزانه چووبوونه سه‌ره‌دانا نه‌خۆشه‌كى ل “ئاواى دارا” ل سنورێ حه‌فته‌غار، ل ده‌مێ ڤه‌گه‌ريانێ كه‌فتينه به‌ر ده‌ست درێژيا گوله‌يێن هێزێن پۆليسێن فيدرال ل ده‌روازه‌يا گۆندى.
وه‌سام عه‌لى كورێ وێ خێزانا عه‌ره‌به و پشكدارى د وێ سه‌ره‌دانێ دا نه‌كريه راگه‌هاند كو پۆليسێن فيدرال ته‌قه ل كه‌سوكارێن وى كريه و هه‌تا مرين ژى ده‌ست ژ ته‌قه‌كرنێ به‌رنه‌دايه و هه‌تا نها چو روونكرن ژى به‌لاڤ نه‌كرينه.
ل ده‌مێ ئينانا برينداران بۆ نه‌خۆشخانا داقوق شه‌ر د ناڤبه‌را پۆليسێن فيدرال و پۆليسێن خۆجهى دا روودايه و ژ ئه‌گه‌رێ وێ چه‌ندێ ئه‌فسه‌ره‌كێ پۆليسێن خۆجهى ب پلا مولازم و ب ناڤێ “محه‌مه‌د” هاتيه كوشتن.
به‌رى كوشتنا ئه‌ندامێن وێ خێزانێ ب نيڤ ده‌مژمێرێ، چه‌كدارێن داعش يێ گۆله‌يێن هاونان ئاراسته‌ى “ئاواى دارا” كربوون، ئێك ژ وان هاونان كه‌فتبوو مالا وه‌لاتيه‌كێ كورد و شه‌ش كه‌س بريندار كربوون ئێك ژ وان ئه‌ڤرۆ گيانێ خوه ژ ده‌ست دا.
هه‌ر ب گۆره‌ى پێزانينێن رووداو به‌لاڤكرين، وه‌زاره‌تا ناڤخۆ يا عيراقێ لژنه‌كا ڤه‌كۆلينێ ره‌وانه‌ى “ئاواى دارا” كريه دا كو ڤه‌كۆلينێ د ڤێ روودانێ دا بكه‌ن.