دامه‌زراندنا كچا فوئاد مه‌عسومى جهێ نه‌رازیبونێ یه
ئه‌ڤرۆ،زنار توڤى:
مالپه‌رێ ئیلافێ یێ عه‌ره‌بى لسه‌ر دامه‌زراندنا دكتورا جوان فوئاد مه‌عسوم وه‌ك سكرتێرا سه‌روك كومارێ عێراقێ راپورته‌ك به‌لاڤكریه و تێدا هاتیه،دامه‌زراندنا كچا سه‌روك كومارێ عێراقێ بناڤ و نیشانێ سكرتێر و موچێ هه‌یڤانه ب 13 ملیون دینارێن عێراقى،نیگه‌رانیه‌كا زور لدویف خوه‌دا ئینایه،بره‌نگه‌كێ كو تورێن كومه‌لایه‌تى وه‌سا داینه دیاركرن كو(عێراق بویه نێچیره‌ك و ئه‌گه‌ره‌كێ تالانكرنا پاره‌ى ژلایێ سه‌ركردێن وێڤه بو به‌رژه‌وه‌ندا خویا تایبه‌تى)،دیاركریه: بكارهێنه‌رێن تورێن كومه‌لایه‌تى بریاره‌كا سه‌روكاتیا كومارێ عێراقێ ئاشكرا كریه،ب دامه‌زراندنا جوان فوئاد مه‌عسوم كچا سه‌روك كومارێ عێراقێ ب موچه‌یێ هه‌یڤانه 12 ملیون و 900 هزار دینارێن عێراقى. مالپه‌رێ ئیلاف زێده‌تر دیاردكه‌ت:كو تورێن كومه‌لایه‌تى ڤێ بریارا سه‌روك كومارێ عێراقێ ب بریاره‌كا تالان برن و دزینا پاره‌ى بناڤ دكه‌ن،شه‌پوله‌كا توند یا نه‌رازیبونێ لێ هاتیه ده‌نگ،كو وه‌ك ئه‌و دبێژن:عێراق دڤى بارودوخێ شه‌ر و ئاواره‌بونێ و كوشتنێ دا بویه نێچیرا سه‌ركردان و به‌رژه‌وه‌ندا تایبه‌تا خوه ئێخستیه پێش به‌رژه‌وه‌ندا گشتى. لدویف وێ فه‌رمانا كو ئیمزایا نه‌سیر عانى سه‌روكێ دیوانا سه‌روك كومارى ل سه‌ره،جوان فوئاد مه‌عسوم كریه سكرتێرا بابێ وێ،موچێ وێ و ده‌رمالێن وێدگه‌هنه 30 ملیون دینارێن عێراقى. ئه‌ڤ مالپه‌ره زێده‌تر خویادكه‌ت:لدویف وێ بریارێ گرێبه‌سته‌ك بو جوان مه‌عسوم هاتیه كرن بو ماوێ ساله‌كێ،دشێن ماوێ وێ بریارێ درێژ تر بكه‌ن و هه‌روه‌سا وه‌ك هه‌ڤالێن وێ ل سه‌روكاتیا كومارى،دێ هه‌مى ده‌رماله و پاداشتان وه‌رگریت،به‌رى نوكه جوان فوئاد مه‌عسوم پله‌یا وه‌زیرا گه‌هاندنێ هه‌بوو،لسه‌ر ده‌مێ حكومه‌تا جه‌عفه‌رى دا ل سالا 2005.
