دانانا ڤاكسینێ بۆ زارۆكان دێ بیته نه‌چاری
ئه‌ڤرۆ، قائید میرو”
پشتی بڕیارا رێكخراوا ساخله‌میا جیهانی بڕیاره لهه‌رێما كوردستانێ ژی ڤاكسینا دژی كۆرۆنایێ بۆ زارۆكێن سه‌رڤه‌ی شه‌ش سالیێ بهێته دانان ئه‌ندامه‌كا لیژنا په‌روه‌ردێ ژی ئاشكراكر، تیمێن گه‌ڕۆك دێ ل قوتابخانه و مالان گه‌ڕن بۆ دانانا ڤاكسینێ و ل ناڤه‌ندێن خواندنێ دانانا ڤاكسینێ بۆ قوتابی و مامۆستا دێ بیته نه‌چاری.
گولستان باقی، ئه‌نداما لیژنا په‌روه‌ردێ و خواندنا بلند لپه‌رله‌مانێ كوردستانێ بۆ رۆژناما ئه‌ڤرۆ دیاركر” بڕیارا حوكمه‌تا هه‌رێما كوردستانێ یه، پێدڤیه ڤاكسینێن دژی كۆرۆنایێ بۆ زارۆكانژی بهێته دانان و رێكخراوا ساخله‌میا جیهانی ژی دوپاتكریه دڤێت زارۆیێن سه‌رڤه‌ی شه‌ش سالیێ دبیت ڤاكسینێ وه‌ر بگرن هه‌تا بهێنه پاراستن ل ڤایرۆسا كۆرۆنایێ، چونكه دده‌مێ نوكه‌دا رێژه‌یه‌كا زۆرا زارۆكانژی تووشی ڤایرۆسا كۆرۆنایێ بووینه و چه‌ندین زارۆك لهه‌رێما كوردستانێ ژی ب ئه‌گه‌رێ ڤایرۆسا كۆرۆنایێ هاتینه نڤاندن ل نه‌خۆشخانا، له‌وڕا پێدڤیه سه‌میانێن قوتابیانژی گوره‌ی زاریێن نۆشداری و زانستی سه‌ره‌ده‌ریێ دگه‌ل ره‌وشێ بكه‌ن و بۆ پاراستنا زارۆیێن خۆ ڤاكسینا كۆرۆنایێ بكار بینن، ل ناڤه‌ندێن خواندنێ دانانا ڤاكسینێ دێ بیته مه‌رج بۆ قوتابی و مامۆستا، واته پێدڤیه هه‌موو مامۆستا و قوتابی ڤاكسینێ وه‌ر بگرن، مه وه‌كی لیژنا ساخله‌می ژی به‌حسێ ئه‌ڤێ بڕیارێ كریه و دێ چاڤدێریا ره‌وشێ كه‌ین.
گولستان باقی ئاماژه‌كر” هێشتا پڕۆسا دانانا ڤاكسینێ بشێوه‌یه‌كی به‌ر به‌لاف نه‌هاتیه ده‌ستپێكرن، به‌لێ وه‌ك قۆناغا ئێكێ و ده‌ستپێك ل هه‌ولێرێ ئێكه‌م زارۆك ڤاكسین وه‌رگرتیه و دێ هه‌وا دانانا ڤاكسینێ بۆ زارۆكان هێته ده‌ستپێكرن و تیمێن گه‌ڕۆك دێ مال ب مال گه‌ڕیێن بۆ دانانا ڤاكسینێ، چونكه مه‌ترسیا ڤایرۆسێ لسه‌ر قوتابیان هه‌یه و راسته زۆر دایك و باب هه‌نه له‌وانه نه‌خوازن ڤاكسینێ بۆ زارۆكێن خۆ دانن، به‌لێ دڤێت ژیانا زارۆكێن خۆ به‌رچاف بگرن و ئه‌و بخۆ هاریكاربن دگه‌ل تیمێن ساخله‌می بۆ دانانا ڤاكسینێ، بتایبه‌تی ل ناڤه‌ندێن خواندنێ پێدڤی ب ڤاكسینێ هه‌یه و زارۆكژی پێدڤی ب پاراستنێ هه‌نه، ئه‌ز باوه‌رم ل رۆژێن داهاتی دێ هه‌وا دانانا ڤاكسینێ ل ناڤه‌ندێن خواندنێ هێته ده‌ستپێكرن و هه‌موو قوتابی و زارۆكێن سه‌رڤه‌ی شه‌ش سالیێ دێ ڤه‌گریت.
