دانوستاندن ل سه‌ر پرسا سه‌رۆكاتيا هه‌رێمێ ئه‌ڤرۆ دێ ل په‌رله‌مانى ده‌سپێكه‌ن
ئه‌ڤرۆ نيوز:
بڕياره ئه‌ڤرۆ رۆژا دوشه‌مبى 27ى تيرمه‌ها 2015ێ سه‌رۆكێن فراكسيۆنان و سه‌رۆكاتيا په‌رله‌مانى ل سه‌ر قانوونا راستڤه‌كرنا سه‌رۆكاتيا هه‌رێما كوردستانێ و ئالوزيێن ناڤبه‌را په‌كه‌كه و توركيا دا كۆمبوون.
ئامينا زكرى، جێگرا سه‌رۆكێ فراكسيۆنا پارتى ديموكراتى كوردستان راگه‌هاند: “ئه‌ڤرۆ هه‌موو سه‌رۆكێن فراكسيۆنێن ناڤا په‌رله‌مانێ كوردستانێ و سه‌رۆكاتيا په‌رله‌مانێ كوردستانێ ل سه‌ر پرسا راستڤه‌كرنا قانوونا سه‌رۆكاتيا هه‌رێما كوردستانێ كۆم بن دا كو دانوستاندنێ ل سه‌ر وێ پرسێ بكه‌ن”.
ده‌رباره‌يى هه‌لويستێ نوو يێ پارتى ديموكراتى كوردستان ل سه‌ر وێ پرسێ ئامينا خانێ گۆت: “مه هه‌مان هه‌لويستێ به‌رى نوكه يێ هه‌يى كو دڤێت لايه‌نێن سياسى بگه‌هنه ل هه‌ڤهاتنێ ل ژ ده‌رڤه‌يى په‌رله‌مانى و ژ نوو ئه‌ڤ پرسه بۆ په‌رله‌مانێ بهێته هنارتن، چونكو ب ديتنا مه ئه‌ڤه نه كارێ په‌رله‌مانى يه”.
پرسا راستڤه‌كرنا قانوونا سه‌رۆكاتيا هه‌رێما كوردستانێ ئێكه ژ وان پرسێن د ناڤبه‌را لايه‌نێن سياسى دا ل باشوورێ كوردستانێ و دانوستاندن ل سه‌ر دهێته كرن و ماوێ دو هه‌يڤانه ل سه‌ر وێ پرسێ نه‌گه‌هشتينه رێكه‌فتنێ.
ل 23ى خزيرانێ و ب ئاماده‌بوونا قونسلێ ئيرانێ ل په‌رله‌مانێ كوردستانێ بێى فراكسيۆنا پارتى، فراكسيۆنێن دى خواندنا ئێكێ بۆ پرۆژێ قانوونا سه‌رۆكاتيا هه‌رێما كوردستانێ كر و ب ڤێ چه‌ندێ ژى كاودان ئالوزتر لێ هاتن.
