داود ئوغلۆى ل دۆر هاتنا له‌شكرێ توركى به‌رسڤا عه‌بادى دا
ئه‌ڤرۆ نيوز:
سه‌رۆك وه‌زيرێن توركيا ل به‌رامبه‌ر داخۆيانيا سه‌رۆك وه‌زيرێن عيراقێ بۆ ڤه‌كێشانا هێزێن خوه ل عيراقێ ره‌تكر.
رۆژا دوشه‌مبى رێكه‌فتى 7ى كانوونا ئێكێ يا 2015ێ جڤاتا ئاسايشا توركيا كۆمبوونه‌ك سازكر و ب گۆره‌يى ميديايێن وى وه‌لاتى د كۆمبوونێ دا به‌حس ل لڤاندنا هێزێن توركيا بۆ نێزيك مووسل كر.
ئه‌حمه‌د داود ئۆغلۆ سه‌رۆك وه‌زيرێ، توركيا د كۆمبوونه‌كێ دا راگه‌هاند، هێزێن وان بۆ هاريكاريكرن و مه‌شقكرنێ ب هێزێن پێشمه‌رگه‌ى ل نێزيك مووسلن و خوه ڤه‌ناكێشن.
راگه‌هاند ژى: “ئاماده‌بوونا هێزێن وان ل عيراقێ وه‌كو هه‌موو ده‌وله‌تێن دى بۆ شيره‌تكارى و مه‌شقكرنێ و چو مه‌ره‌مێن نهێنى نينن، ديسا ل سه‌ر داخوازيا وه‌زاره‌تا به‌ره‌ڤانيا عيراقێ مه ئه‌ڤ كاره كريه”.
رۆژا ئێكشه‌مبى 6ى كانوونا ئێكێ يا 2015ێ جڤاتا ئاسايشا نشتيمانى يا عيراقى ب سه‌رۆكاتيا حه‌يده‌ر عه‌بادى، پرسا هاتنا له‌شكرێ توركيا بۆ ناڤ ئاخا عيراقێ گه‌نگه‌شه كر و ماوێ 48 ده‌مژمێران مۆله‌ت بۆ ڤه‌كێشانا وان هێزان دياركر.
ب گۆره‌يى پێزانينان هێزێن توركيا ل عيراقێ ژ دو هزار و 100 له‌شكر و كۆماندۆسان پێك دهێت و ب چه‌كێ گران ل سێ جهان هاتينه بنه‌جهكرن.
هێزێن توركيا ل نێزيك باشيكێ هاتينه بنه‌جهكرن، كه‌تيبه‌يه‌كا له‌شكرى يا ته‌مامه و ژ هزار و 200 له‌شكرى پێكدهێت و چه‌كێ وان ژى پێك هاتيه ژ 16 تانك و 20 زريپۆش “چار قه‌بارێ مه‌زنن”، 8 قاميۆنێن فيشه‌كان و 15 كۆسته‌ر و 18 قاميۆنێن نه‌فه‌ر هه‌لگر. ديسا 500 چه‌كدارێن دى ل بامه‌رنێ و نه 500 كۆماندۆس ژى ل كانى ماسێ.
