دایـك؛ كـانییا دلـۆڤانـی و خـۆڕاگـریێ یـە
رۆژین رەمەزان
ئەو چاڤێن گەش یێن ل بن سیبەرا بێدەنگییێ؛ د ناڤ تاریاتییا شەڤێ دا ل شوینا خەوێ ژ ڕۆندكان دبڕسقین، ئەو ڕوحا د گەشترین دەمێن تەمەنی دا ل شوینا ئارامییێ ژ بێچارەیی و بارگرانییا ژیانێ دناڵی، ئەو دەستێن ساڕ و زڤر ژ كاركرنێ دلەرزی، نە جارەكێ مە شییا د ئازارێن وێ بگەهین نە دەرمانەكێ بۆ برینێن وێ ببینین. دایك؛ ئەو مۆما بێ بەرانبەر خۆ سۆتی؛ سۆتنەكا بێ دەنگ و بێ گازندە، ئەو سۆتنا برینەكا كویر ل ڕوحا تەمەنێ وێ كری، لەشێ خۆ ل بەرانبەر تارییێ پارڤەكری، ب تنێ دا ڕێكا ژیانێ ل مە ڕۆهن بكەت.
ئەو كانییا دلۆڤانییێ و خۆڕاگریێ یا بەردەوام؛ كانییەكا كو هەر چەندە مرۆڤ ژێ ڤەخۆت و برینێن خۆ ل سەر بشۆت، هێشتا ب بێ مەرج و ب بێ ڤەحەواندن ل سەر ڕێڕەوا خۆ بەردەوامە. وێ ساخلەمی، جوانی و هەمی خەونێن گەنجاتییا خۆ كرینە قوربانی ب تنێ داكو لەشێ مە ب گەرماتییا وێ گەرم ببیت و دەرۆنا مە ئارام بیت. ئەڤە ئەو دلۆڤانییا بێ سنوورە، هەروەسا ئەو ئاخا ب پێتە كو لاڤا ژێ دهێنە چاندن. د ڕاستی دا ئەڤە دەنگێ پارچەبوونا وێ بوو، ئەوێ هەمی پارچەیێن ساخ یێن لەشێ خۆ كۆم دكر داكو مە پێ ئاڤا بكەت؛ ل دەمێ ئەم ئاڤابووین و ب سەركەڤتین مە چ كر؟ مە چ پێشكێشی ئەوێ باجا گران كر ئەوا وێ ب تەمەنێ خۆ دایی؟ مە چەند جار دەستێن وێ یێن لەرزۆك گرتن و گۆتێ: “ئەم دزانین تو چەند برینداری”؟. ڕاستی ئەوە مە ئەو ل ژۆرەكا تاڕی و ل سەر مێزا تەمەنێ وێ ب تنێ و ب چاڤێن گری ڤە هێلا، ئەم چووین و مە خۆشی ب تەمەنێ خۆ بر، مە فێستیڤالا سەركەڤتنێن خۆ ل جهەكێ دویری وێ كر. مە خۆ دویری ئەوێ ئارامییێ كر یاكو جیهانێ ب هەمی بەرفرەهییا خۆڤە نەشیایی پێشكێشی مە بكەت.
دایك چیرۆكا سۆتنەكا بێدەنگە، قوربانییەكا نەمرە، ئەڤە نە ب تنێ چیرۆكا سۆتنا وێ یە، بەلكو چیرۆكا بێوەفایییا مەیە ل بەرانبەر وێ مۆما كو تەمەنێ مە ب خوینا دلێ خۆ رۆهنكری و مە ژیێ خۆ ل سەر برینێن وێ ئاڤاكری، بێی كو بزانین كو چ مۆم بۆ هەتا هەتایێ نەماینە هەل.
گەلەك جاران مرۆڤ هزردكەت كو د ژیانێ دا یێ ب تنێ یە، یان ب تنێ ل سەر پێن خۆ ڕاوەستاییە، لێ ڕاستییەكا پیرۆز هەیە و مرۆڤ زوی تێناگەهیت. دەمێ مامۆستایێ رۆژنامەڤانێ دهۆكێ “شێرزاد نایف”ی گۆتی “ ئەز و دایكا خۆ ئێك جەستە و ڤیگەربووین .. وەریسەكی ئەم پێكڤە گرێدداین و ئێك جسم بووین”، ل ڤێ ساتێ من زانی كا پەیڤ چەند دشێن د ناڤ قولاتییا برینێن مرۆڤی دا بگەڕیت، من دیت كو هەر چەند مرۆڤ مەزن ببیت، چەند ل سەر پێن خۆ ڕابوەستیت و ل جیهانێ بگەڕیت، پێدڤی ب وێ كانیا دلۆڤانییێ یە ئەوا د ناڤ دەستێن دایكێ دا دزێت. د ڤێ گۆتنێ دا ماموستایی برینەك ڤەكر كو هەر ئێك ژ مە د ناڤ دەروونێدا خۆدا یێ ڤەشارتی، ئەو ژی ئەوە دابڕان ژ دەیكێ، دابڕانە ژ ژیانێ.
