دا جگارێ قەدەغە کەن ، نەرگیلە ژی ھاتە سەر
ئەڤرو نیوز ، نەوزاد زادە ھلوری:
ب ھەلکەفتا رۆژا جیھانیا نەھێلانا جگارە و نەرگیلێ ، سوبەھی ل ھەردوو پارێزگەھێن دھۆک و ھەولێر دێ چەند چالاکیەک ھێنە ئەنجامدان ، بەلێ چالاکڤانێن جڤاکێ سڤێل دیار دکەن کو ھەتا نھا حکومەت و جھێن شولەژێ ژبلی بلندکرنا درۆشمان نەشیانە چوو بکەن ، و شوونا کو جگارێ قەدەغە بکەن نەارگیلە ژی ھاتیە سەر.
دڤی واریدا ” سەلام بەرواری ” بەرپرسێ راگەھاندنا رێکخراوا گەنجینە بۆ گەشەپێدانا گەنجان بۆ ئەڤرو نیوز گۆت: (ب ھەلکەفتا رۆژا جیھانیا نەھێلانا جگارەکێشان و نەرگیلێ و ل ژێر درۆشمێ جگارە و نەرگیلە ھەرەشەیێ ل گەشەپێدانا مرۆڤان دکەن ، سەنتەرێ گەشەپێدانا چالاکیێن لاوان ل دھوکێ ب ھەڤکاری ل گەل رێکخراوا ئەلند بو دیموکراسیکرنا گەنجان و رێکخراوا گەنجینە بۆ گەشەپێدانا گەنجان دێ رابین ب ساخکرنا ھەلکەفتا رۆژا جیھانیا نەھێلانا جگارە و نەرگیلێ ل پارێزگەھا دھوکێ )
زێدەتر گۆت: (سوبەھی ب شەڤ ل دەمژمێر ٢٢:٠٠ ل پارکێن گەلیێ دھوکێ دێ چەندین چالاکی ھێنە ئەنجامدان ژ وانان ژی دەرکرنا بەیاننامەیان ، بەلاڤکرنا پوستەر و پریشورا و دیوارێ ئازاد ئەڤە زێدەباری کو دێ چەند نامیلکە ژی ھێنە بەلاڤکرن و سەربورەک ژی ژلایێ بەرھەڤبووان دھێتەکرن لسەر کاغەزان ، و دیسان ب مەرەما کار لسەر کرنێ دێ ئەوێ بەیاننامەیێ رادەستی ئەنجوومەنا پارێزگەھا دھوکێ کەین داکو کومبوونەکێ لسەر ئەنجام بدەن)
ژلایکێ دنڤە ھەر ب ھەلکەفتا روژا جیھانیا نەھێلانا جگارەکێشان و نەرگیلێ ل ھەولێرێ ژی چەند چالاکیەک ھێنە ئەنجام دان ژ وانان ژی دێ ل سەنتەرێ پارێزگەھا ھەولێر بو ھەیاما ١٢ رۆژان ھەوەکا نیشتمانی بۆ نەھێلانا جگارە و نەرگیلەیێ دەست پێ کەت کو ئەو ژی گرانکرنا باجێ یە لسەر کەرستەیێن وان و ھوشیارکرنا خەلکی یە ب رێیا پوستەر و سمینار و ورگ شوپان و زیانێن ساخلەمی و دارایی و جەستەیی بو بەرھەڤبوونان ھێنە شلوڤەکرن.
شڤان محەمەد وەکو چالاکڤانەکێ سڤێل ددەتن دیارکرن کو ھەتا نھا ل ھەرێما کوردستانێ چوو پێنگاڤەکا ئەرێنی بۆ نەھێلانا جگارێ و نەرگیلێ نەھاتیە ھاڤێتن و بۆ ئەڤرو نیوز گۆت: (جگارە و نەرگیلە ژ ماددێن ھەری مەترسیە ل جیھانێ کو ھەرەشەیێ ل ژیانا وەلاتیان ب تایبەتی گەنجان دکەن و سالانە ھژمارەکا زورا بکارھێنەرێن وان دبنە قوربانی ، سەرەرای مەترسیا وان ژی بەلێ وەکو پێدڤی ل ھەرێما کوردستانێ کار بۆ نەھێلانا وان نەھاتیەکرن و شوونا کو جگارە بھێتە قەدەغەکرن ، نەرگیلە ژی ھاتیە سەر و ئەڤ یەک ژی نیشانە کو ھەوێن لایەنێن شولەژێ ژ حکومەت و رێکخراوان بتنێ درۆشم بوینە)
زێدەتر گۆت: (باشترین رێک بو نەھێلانا وان ئەوە کو حکومەت باجێن گران دانیتە سەر جگارە و نەرگیلێ و کەرستەێن وان یان ژی نەھێلیت کو بھێنە ناڤا ھەرێمێ ، و دیسان قانونەکێ بدانیت کو دژیەکێ دیارکری دا و ل ھندەک جھێن دیاری بھێتە کێشان بەروڤاژی سزایێن گران لسەر بھێنەدانان)
لگورەی راگەھاندنا رێکخراوا ساخلەمیا جیھانی ، کێشانا جگارە و نارگیلایێ ١٧ نەخوشیێن جوراوجور لدەف مروڤی پەیدا دکەت ژ وان ژی پەنجەشێر و نەھێلانا گولچیسکا و ھەناسەدان و کارتێکرنێ لسەر ھەموو پشکێن لەشێ مرۆڤی دکەت.
