دبلوماسیەکێ ئەمریکی: نابیت ل کوردستانێ سەقامگیری ببیتە قوربانیا گوھۆرینێ
ئەڤرۆ:
دبلوماسیەکێ بەرنیاسێ ئەمریکی ل دۆر قەیرانا سەرۆکاتیا ھەرێما کوردستانێ راگەھاند، ل کوردستانێ دەمێ گوھۆڕینێ یێ ھاتی، بەلێ پێدڤیە سەقامگیری نەبیتە قوربانیا گوھۆڕینێ.
رۆبەرت فۆرد کو ل سالێن ٢٠٠٨ ھەتا ٢٠١٠ جێگرێ بالیۆزێ ئەمریکا بو ل عیراقێ و چەندین سالان بالیۆزێ ئەمریکا بوو ل سووریێ و جەزائیرێ بۆ رووداو گوت” ھەرێما کوردستانێ بەراوردکرن ل گەل سالا ٢٠٠٠ ێ گەلەک یا ھاتیە گوھۆڕین و پێدڤیە پتر یا ڤەکری بیت و ریفۆرما سیاسی زێدەتر ئەنجام بدەت، لێ نابیت ھەرێما کوردستانێ بەر ب بارودۆخەکێ وەکو سووریێ بچیت”.
ڤی دبلوماسیێ ئەمریکی رۆلێ مەسعود بارزانی سەرۆکێ ھەرێما کوردستانێ وبنەمالا وی ب بلند نرخاند و دبێژیت” وان خەباتەکا مەزن یا کری، بەلێ گوھۆڕین ژی یا پێدڤیە”.
فۆردی دوت ژی” دەمێ ئەز چویمە عیراقێ کو ل بالیۆزخانا ئەمریکا کار بکەم، ل سالا ٢٠٠٤ ێ من سەرەدانا ھەرێما کوردستانێ کر، ب راستی ژی دو حزبێن سیاسی ھەبوون ئەوژی حزبا سەرۆک بارزانی ( پارتی دیموکراتی کوردستان) ل گەل حزبا سەرۆکێ عیراقێ یێ وی دەمی ( جەلال تالەبانی) ئەوژی (ئێکەتی نیشتمانی کوردستان)، بەلێ نوکە چار ھەتا پێنج حزبێن مەزن ل ھەرێما کوردستانێ یێن ھەین”.
ل دۆر وێ چەندێ کا سیستەمێ سیاسی ل ھەرێما کوردستانێ یێ چاوان بیت، فۆردی گوت” ئەو کارێ من نینە بێژم چاوان ھەرێما کوردستانێ بھێتە ب رێڤەبرن، بەلێ ئەو چەندا ل دەڤ من گرنگ ئەوە گوھۆڕین یا ب رێڤە، گەلەک یا گرنگە سیاسەت ل ھەرێما کوردستانێ ب ئاشتی و سەقامگیری بمینیت”.