دبیت ل سالا 2019 ده‌رگه‌هێ سه‌رزێرى ببیته ده‌رگه‌هه‌كێ بازرگانى
ئەڤرۆ نیوز ، زنار تۆڤى:
نوكه ده‌رگه‌هێ سه‌رزێرى ل ده‌مژمێر 8:30 سپێدێ هه‌تا پێنجێ ئێڤارێ یێ ڤه‌كریه و خه‌لك دشێن هاتنوچوونێ لێ بكه‌ن، هه‌روه‌سا ل رۆژانێن شه‌مبى و ئێكشه‌مبى خه‌لك نه‌شێن هاتنوچوونێ د ڤى ده‌رگه‌هى را بكه‌ن و یێ گرتیه، ده‌رگه‌هێ سه‌رزێرى دكه‌ڤیته سنۆرێ ناحیا كانى ماسێ و سه‌ر ب قه‌زا ئامێدیێ ڤه‌یه، ل 20/9/2016 ئه‌ڤ ده‌رگه‌هه ب ره‌نگه‌كێ فه‌رمى دناڤبه‌را هه‌رێما كوردستانێ و توركیا دا هاتیه ڤه‌كرن، لێ هێشتا نه‌بوویه ده‌رگه‌هه‌كێ بازرگانى.
عرفان سلێمان ئه‌لكیشكى رێڤه‌به‌رێ ده‌رگه‌هێ سه‌رزێرى بۆ ئه‌ڤرۆ نیوز دیاركر: نوكه ره‌وشا هاتنوچوونا وه‌لاتیان ل ده‌رگه‌هێ سه‌رزێرى گه‌له‌ك باشه و ئه‌و وه‌لاتیێن رۆژانه ژ باكور دهێنه كوردستانێ تشتان دكرن، مه بریاره‌ك دایه كو ئه‌و 24 ده‌مژمێران بمینن و ئێدى ئه‌و نه‌شێن د رۆژا خوه‌دا ڤه‌گه‌رنه باكور، هه‌روه‌سا ڤێ چه‌ندێ وه‌كریه كو ئێدى گه‌له‌ك قه‌ره‌بالغ نه‌مینیت، دیسا ل ده‌مێ سپێده‌هیان سرا ترۆمبێلان هه‌یه و لێ پشتى نیڤرۆ سرا ترۆمبێلان نامینیت و وه‌لاتى دشێن ب ساناهى ده‌ربازى ره‌خێ دى ببن، هه‌روه‌سا نوكه رۆژانه پتر خه‌لك هاتنوچوونێ ل ده‌رگه‌هێ سه‌رزێرى را دكه‌ن و رێژا هاتنوچوونا ترۆمبێلان زێده‌بوویه و ئه‌و ترۆمبێلێن دهێن هه‌موو هه‌تا پشتى نیڤرۆ ده‌رباز دبن بۆ ئالیێ باكور و ئه‌ڤه وه‌كو داهاته‌ك بۆ هه‌رێما كوردستانێ گه‌له‌ك باشه، هه‌ر چه‌نده رێژا هاتنا وه‌لاتیان ل سالا بورى ژ ئه‌ڤ ساله چێتربوو، د سالا بورى دا و ب تایبه‌تى پشتى هه‌یڤا نه‌ه د رۆژه‌كێ دا نێزیكى 1700 وه‌لاتیان هاتنوچوون د ده‌رگه‌هێ گومركا سه‌رزێرى را كربوو، ناڤهاتى دیاركر ژى: ئه‌ڤ ساله توركیا هنده‌ك تێبینى هه‌بوون و نه‌شیان ب وى ره‌نگێ به‌رفره‌ه رێیا وه‌لاتیان بكه‌ن بهێنه هه‌رێما كوردستانێ، هه‌روه‌سا توركیا خه‌لكێ ل ره‌خێ خوه گیرو دكه‌ن، ژبه‌ر هندێ ئالیێ توركى ب وى ره‌نگێ به‌رفره‌ه ناهێلن ترۆمبێل بهێنه ئالیێ كوردستانێ، لێ مه پێنگاڤێن باش هاڤێتینه كو ئه‌ڤ ده‌رگه‌هه ببیته 24 ده‌مژمێرى و توركیا ژى كار ل سه‌ر ڤێ چه‌ندێ كار كریه و مه هیڤى هه‌یه كو سالا 2019 ساله‌كا خێرێ بیت بۆ ده‌رگه‌هێ سه‌رزێرى، دیسا حوكمه‌تا توركیا ل سه‌ر ئاستێن بلند ژى دووڤچوونا ڤى ده‌رگه‌هى دكه‌ن، بۆ هندێ كو ئه‌و ژى گرنگیێ ب ڤى ده‌رگه‌هى دده‌ن و بكه‌نه ده‌رگه‌هه‌كێ فه‌رمى یێ بازرگانى و دیسا 24 ده‌مژمێران یێ ڤه‌كرى بیت، نوكه ب ره‌نگه‌كێ به‌رفره‌ه كار ل سه‌ر ڤێ چه‌ندێ دهێته كرن، دیسا چێدبیت ل سالا 2019 ئه‌ڤ ده‌رگه‌هه ببیته ده‌رگه‌هه‌كێ بازرگانى و چونكى لایه‌نێ توركى به‌رهه‌ڤیێن باش بۆ ڤێ چه‌ندێ كرینه و وان ل به‌ره كومه‌لگه‌هه‌كا بازرگانى چێكه‌ن.
رێڤه‌به‌رێ ده‌رگه‌هێ سه‌رزێرى زێده‌تر دبێژیت: ئه‌و ژى دێ گوهۆرینان د كۆمه‌لگه‌ها سه‌رزێرى دا كه‌ن، دیسا ئه‌و ژى دێ ماسته‌ر پلانه‌كێ بۆ كۆمه‌لگه‌هه‌كا نوو ل ده‌رگه‌هێ سه‌رزێرى دانن و دێ به‌رفره‌هتر لێ كه‌ن، دیسا وان هه‌موو پێدڤى و به‌رهه‌ڤى بو ڤى كارى كرینه، لێ ئه‌ڤ چه‌نده دێ مینیته ل هیڤیا ئاڤاكرنێ، دیسا وان ماسته‌ر پلانه‌ك بۆ چێكرنا رێكا سه‌رزێرى هه‌ر ژ گۆمركێ هه‌تاكو دگه‌هیته گوندێ ئه‌لكیشكێ چێكریه و نوكه یا كه‌فتیه د وارێ بجهئینانێ دا.
