دبیت هێرشا ئیسرائیلێ ل سەر ئیراقێ ببیتە ئەگەرێ ژناڤبرنا سیستەمێ سیاسی و ئابووری و لەشكری ل ئیراقێ و ژناڤچوونا حوكمەتا وێ
مالپەرێ (میدل ئیست ئای) یێ بریتانی بەلاڤكر، میلیشیێن ئیراقی ژ زاردەڤێ بەرپرسێن ئیراقی و سەركردەیێن میلیشیێن چەكدار یێن ئیراقی یێن سەر ب ئیرانێ ڤە راگەهاند، ئەو د نوكە دا پتر باس ل پێدڤییا پێشكێشكرنا هاریكاریێن مرۆڤایەتی و پشتەڤانییا دارایی بۆ وان هەڤوەلاتیێن مەدەنی یێن ژ ئەگەرێ شەڕێ ئیسرائیلێ ل سەر لوبنانێ زیان گەهشتینێ، دكەن.
د راپۆرتێدا ئاماژە ب زێدەبوونا وێ شەڕی هاتیە كرن، ب تایبەتی پشتی كوشتنا حەسەن نەسروللا، ئەمیندارێ گشتیێ حزبوللا یا لوبنانی و هاڤێتنا مووشەكێن بالیستی ژ ئالیێ ئیرانێ ل سەر ئیسرائیلی كو زیان ب بنگەهێن لەشكری یێن ئیسرائیلی گەهاندییە، زێدەباری هێرشێن گرۆپێن چەكدار ل ئیراقێ یێن نێزیكی ئیرانێ ب درۆنان دژی ئیسرائیلێ، ئاماژە ب وێ چەندێ ژی كر كو ئەڤێ چەندی ئەگەرێ پشكدارییا زێدەتر یا ئیراقێ د شەڕیدا، چ ب رێكا لەشكرێ ئاساییێ ئیراقێ بین یان گرۆپان، بەلێ بەرپرسێن ئیراقی دبێژن باوەرییەك یا هەی كو دبیت ئەڤە ببیتە ئەگەرێ ژناڤبرنا سیستەمێ سیاسی و ئابووری و لەشكری ل ئیراقێ و ژناڤچوونا حوكمەتا وێ.
د وێ راپۆرتا مالپەرێ بریتانی دا ئاماژە ب وێ چەندێ هاتییە كرن كو محەمەد شیاع سۆدانی، سەرۆك وەزیرێن ئیراقێ،ل چەند رۆژێن بۆری، ب دەهان دیدار ل گەل سەركردەیێن سیاسی و سەرۆكێن گرۆپێن چەكدار یێن هەڤپەیمان ل گەل ئیرانێ و ئەفسەرێن بلند یێن دەزگەهێن ئەمنی، ئەنجامداینە.
راپۆرتێ ژ زاردەڤێ ئێك ژ شیرەتكارێن محەمەد شیاع سۆدانی ڤەگوهاست» سەرۆك وەزیرێن ئیراقێ بزاڤكریە د وان دیداراندا واقعێ وێ رەوشا روو ب روویێ ئیراقێ بووی و دەرئەنجامێن تێكهەلبوونا هەر ئالییەكێ ئیراقێ د ململانێیا د دەڤەرێدا هەی، رۆهن بكەت» .
دوپاتكر ژی كو» محەمەد شیاع سۆدانی ل گەل هەژمارەكا مەزن یا دیپلۆماتكارێن ئەرەب و رۆژئاڤایی ژی كۆمبوویە، هەروەسا ل گەل گەلەك ژ سەركردەیێن وەلاتێن دەوروبەر ئاخڤتییە، ژ وان ژی سەرۆكێ مسرێ و میرێ قەتەرێ و پاشایێ ئوردنێ».
ب گۆڕەی وی شیرەتكارێ سەرۆك وەزیرێن ئیراقێ» سۆدانی داخواز ژێ كر د هاریكار بن د راگرتنا هێرشێن بەردەوام یێن ئیسرائیلێ ل سەر لوبنانێ و غەزە كو ئەو چەندە گەفێ ل بەفرەهكرنا ململانێیان ل دەڤەرێ دكەت».
د راپۆرتا وی مالپەرێ بریتانی دا ژ زاردەڤێ بەرپرسێن ئیراقی و سەرۆكێ میلیشییان ئاماژە ب وێ چەندێ هاتییە كرن كو ب دیتنا وان ئیراق دێ ئێك ژ چار وەلاتان بیت كو ئیسرائیل ل ڤان نێزیكان دێ هێرشێ كەتە سەر، ئەڤە ژی وەكو كارڤەدانەك بۆ هێرشێن مووشەكی یێن ئیرانێ و هێرشێن گرۆپێن چەكدار یێن ئیراقی ل سەر ئیسرائیلێ.
هەر د وێ راپۆرتێدا هاتییە « هێرشێن ئیسرائیلێ ل سەر لوبنانێ و حزبوللا د دەمێ بۆریدا، سەركردایەتییا ئیسرائیلێ و هەڤوەلاتیێن ئیسرائیلی دلخوەش كرینە».
هەر ژ زاردەڤێ وی شیرەتكارێ سۆدانی هاتە ڤەگوهاستن كو» مووشەكێن ئیرانێ خوەشحالییا ئیسرائیلێ و هەڤوەلاتیێن وێ ڤەرەڤاند».
ب گۆڕەی هەمان شیرەتكارێ سەرۆك وەزیرێن ئیراقێ» ئەڤە ب وێ رامانێ دهێت كو ئیسرائیل دێ بەرسڤا ڤان هێرشان دەت، و ب پشتڕاستیڤە دێ هێرشێ ل سەر ئیراقێ كەت، هەروەسا دێ هێرشێ ل سەر سووریێ و یەمەنێ ژی كەت، ژبلی هندەك جهێن پەترۆلی ل ئیرانێ».
هەروەسا ئاماژە ب وێ چەندێ ژی» سۆدانی بزاڤێ دكەت ئیسرائیل هێرشێ نەكەتە سەر ئیراقێ».
ب دیتنا شیرەتكارێ سۆدانی» رەوشا سیاسی و ئەمنی و ئابووری ل ئیراقێ یا هەستییارە و تەحەموللا سەركێشییا هیچ ئالییەكی ناكەت و هەر رەفتارەكا خراب هزر تێدا بهێتە كرن كو ل رۆژێن داهاتی دێ باجەكا گران بۆ هەبیت و دبیت هەموو تشتەك بهێتە سۆتن».
