دبیت کۆمبوونا ئەڤرۆ یا پەرلەمانێ عیراقێ د دو ھۆلان ڤە بھێتە کرن
ئەڤرۆ نیوز:
بۆ کۆمبوونا ئەڤرۆ 26 نیسانێ یا پەرلەمانێ عیراقێ، پەرلەمانتارێن کورد دێ ژ ھەرێما کوردستاتێ زڤرن بۆ بەغدا، ھەکە رێککەفتن ژی د ناڤبەرا ھەموو فراکسیۆنێن پەرلەمانی نەھێتە کرن، دێ کۆمبوونا پەرلەمانی د دو ھۆلان دا ھێتە ئەنجامدان.
موسەنا ئەمین سەرۆکێ فراکسیۆنا ئێکگرتووی ئیسلامی کوردستان ل پەرلەمانێ عیراقێ بۆ رووداوێ گۆت” ئێڤاریا رۆژا دو شەمبی 25 نیسانێ پەرلەمانتارێن کورد زڤرینە بەغدا تاکو پشکدارببن د کۆمبوونا پەرلەمانێ عیراقێ دا”.
ب دیتنا موسەنا ئەمینی، ھەکە رێککەفتن نەھێتە کرن دێ کۆمبوونا پەرلەمانێ عیراقێ ل دو ھۆلان ڤە ھێتە کرن، بەحسێ وێ چەندێ ژی دێ ھێتە کرن کا ل کیش ھۆلێ 165 پەرلەمانتار دێ بەرھەڤ بن، دێ شەرعیەت ل دەف وی بەرەی بیت.
ل دۆر ھەلویستێ پەرلەمانتارێن کورد، سەرۆکێ فراکسیۆنا ئێکگرتووی ئیسلامی کوردستان گۆت” دەستەیا سەرۆکاتیا پەرلەمانی ل کیش ھۆلێ ڤەبن، پەرلەمانتارێن کورد دێ چنە د وێ ھۆلێ ڤە، چونکی ھەتا نوکە دەستەیا سەرۆکاتیا پەرلەمانی شەرعیەت یا ھەی و نەھاتیە لادان”.
ناکۆکیێن ل سەر کوھۆڕینێن د حوکمەتا عیراقێ دا، پەرلەمانێ عیراقێ کریە دو بەرە کو بەرەیەک ژوان کو ب ناڤێ پەرلەمانتارێن مانگرتی دھێتە ناڤکرن، داخوازا گوھۆڕینا دەستەیا سەرۆکاتیا پەرلەمانی دکەن و ل دەف وان دەستەیا سەرۆکاتیا پەرلەمانی ژلایێ وان ڤە یا ھاتیە لادان ژ سەر کارێ وان.
ل کۆمبوونا رۆژا پێنج شەمبی 14 نیسانا 2016 ێ، یا پەرلەمانێ عیراقێ کو ب سەرۆکاتیا عەدنان جەنابی و وەکو وان ب خوە گۆتی ب بەرھەڤبوونا 174 پەرلەمانتاران، کو بێ پەرلەمانتارێن کورد ھاتیە ئەنجامدان، دەستەیا سەرۆکاتیا پەرلەمانێ عیراقێ ل سەر کاری ھاتە لادان و پاشی سەرۆکاتیا پەرلەمانی ئەو دەنگدانە ب دەنگدانەکا نەقانوونی ھژمارت و راگەھاند رێژەیا قانوونی یا پەرلەمانتاران یا تمام نەبوو.
بەرەیێ دی ژی ل گەل مانا دەستەیا سەرۆکاتیا پەرلەمانی نە و رەت دکەن کو دەستەیا سەرۆکاتیا پەرلەمانی ھاتبیتە گوھۆڕین، ھەردو بەرە ژی دووپاتیێ ل سەر وێ چەندێ دکەن کو ئەڤرۆ 26 نیسانێ دێ کۆمبوونا پەرلەمانی ئەنجام دەن.
