دخوازین رەوشا نە هنارتنا بۆدجەی و مووچەی ب شێوەیەكێ رێكخستی ژ بەغدا ب دووماهی بهێت
دوهی دوشەمبی 23/7/2024، فازل میرانی، بەرپرسێ دەستەیا كارگێرییا مەكتەبا سیاسی یا پارتی دیموكراتی كوردستان پێشوازی ل (ئەندرو بیزلی) قۆنسلێ گشتیێ بریتانیا ل هەولێرێ كر.
د روونشتنەكێدا فازل میرانی رۆناهی ئێخستە سەر رەوشا ئەڤرۆ یا كوردستانێ وئیراقێ و دەڤەرێ، سەبارەت ب رەوشا كوردستانێ ژی ئاماژەكر كو هێزێن سیاسی ل هەرێما كوردستانێ د قۆناغا خوە بەرهەڤكرنێدا نە بۆ ئەنجامدان هەلبژارتنێن پەرلەمانێ كوردستانێ و پێكئینانا حوكمەتەكا نوو.
هەروەسا دیاركر « هەرێما كوردستانێ یا بەردەوامە د ئاڤەدانكرن و پێشكەفتنێدا سەرەرای نە هنارتنا بۆدجەی و مووچەی ب شێوەیەكێ رێكخستی ژ بەغدا، هیڤی ژی خواست ئەڤ رەوشە ب دووماهی بهێت».
سەبارەت رەوشا دەڤەرێ و ئیراقێ میرانی دووپاتكر كو دەڤەر نەسەقامگیریێ بخوەڤە دبینیت و هیڤیدارین هەموو ئالییەك رۆلی خوە بگێریت بۆ سەقامگیركرنا دەڤەرێ.
ژ ئالیێ خوەڤە قۆنسلێ گشتیێ بریتانیا ل هەولێرێ پەیوەندیێن د ناڤبەرا حوكمەت و گەلێ بریتانیا ل گەل حوكمەت و گەلێ كوردستانێ ب دیرۆكی و سەركەفتی هەژمارتن و هیڤی خواست كوردستان و گەلێ كوردستانێ دپێشكەفتنێدا بن.
