دكتۆر مه‌حمود عوسمان: سیاسه‌تی دیپلۆماسی كوردستان له‌ئاستێكی باشدایه و پێویسته په‌ره‌ی پێبدرێت
ئه‌ڤرۆ نیۆز عه‌زیز هه‌ورامی:
سیاسه‌ت مه‌دارێكی كورد ده‌ڵێ، كۆبونه‌وه و دیداره‌كانی سه‌رۆكی هه‌رێمی كوردستان له‌گه‌ڵ گه‌وره‌به‌رپرسانی وڵاتانی جیهان له داڤۆس گرنگه و پێویسته كورد ناوماڵی خۆی ڕێكبخاته‌وه و زیاتر كار له‌سه‌ر په‌ره‌پێدانی لۆبی كوردی بدات له وڵاتان.
دكتۆر مه‌حمود عوسمان سیاسه‌ت مه‌داری كورد، تایبه‌ت به ئه‌ڤرۆ نیۆز ڕاگه‌یاند:” ئاستی پێوه‌ندییه دیپلۆماسییه‌كانی كوردستان له ئاستێكی باشدایه، به‌شداری سه‌رۆكی هه‌رێمی كوردستان له 50مین كۆڕبه‌ندی ئابووری جیهانی داڤۆس، ئه‌نجامدانی چه‌ندین كۆبوونه‌وه‌ی گرنگ له‌گه‌ڵ سه‌رۆك و سه‌ركرده و وه‌زیر وڵاتانی دنیا گرنگه و پێویسته پێوه‌ندی دیپلۆماسی زیاتر په‌ره‌پێبدرێت”.
مه‌حموود عوسمان وتیشی:” دیدار و كۆبونه‌وه‌كانی نێوان سه‌رۆكی هه‌رێمی كوردستان و له‌گه‌ڵ به‌رپرسانی باڵای جیهانی باس كردن له دۆخی ناوچه‌كه و عێراق و كوردستان به‌ده‌ست هێنانی پشتیوانی نێوده‌وڵه‌تی بۆ حكوومه‌ت و گه‌لی كورد گرنگه، ته‌واوی ده‌رفه‌ته‌كان بۆ یاتر به‌هێزكردنی پێگه‌ی كوردستان بقۆزێته‌وه”.
زیاتر ده‌ڵێ، پێویسته له‌ناوخۆی كوردستانیش كورد ناوماڵی خۆی زیاتر یه‌ك بخات چونكه به‌هێزی ناوخۆ و پشتیوانی گه‌ل و هێزه‌كان بۆ ده‌سه‌ڵات واده‌كات زیاتر له سه‌ر ئاستی وڵاتانی دنیا قه‌زیه‌ی كوردی به‌ره‌و پێشه‌وه بڕوات و پێوه‌ندی وڵاتان له‌گه‌ڵ هه‌رێمه‌كه‌دا به‌هێزببێت”. ناوبراو بڕوای واییه، ده‌بێت حكوومه‌ت و سه‌رۆكایه‌تی هه‌رێمی كوردستان زیاتر كارله‌سه‌ر فراوانكردنی پێوه‌ندییه‌كانی كوردستان له‌گه‌ڵ ته‌واوی ده‌وڵه‌تانی ناوچه‌كه و جیهان بكات و لۆبی فراوانبكات سه‌ردانی ده‌وڵه‌تان بكه‌ن، گفتوگۆ و ناوه‌ڕۆكی كۆبونه‌وه‌كانی سه‌رۆكی كوردستان له‌گه‌ڵ سه‌رۆك وه‌زیران و سه‌رۆك كۆمار و وه‌زیره‌كان له داڤۆس گرنگه به‌هیواین هه‌نگاوی باشی لێبكه‌وێته‌وه”.
