دلبه‌را دوور ژ ویصالێ – 2
دلبه‌را دوور ژ ویصالێ – 2
د. عارف حیتۆ و شه‌مال ئاكره‌یی
عارف حیتۆ:
تووتى یا ژ به‌ر خویل دبن تووتى
ئه‌ڤ جانێ هێژ ل به‌ر جۆتى
ته ب ئاوڕان یێ ڤه‌ڕۆتى
عه‌مر بۆرى، بۆ ته زه‌كات
شه‌مال ئاكره‌یی:
ل په‌نا من تو نه‌هاتى
ب سێڤه سۆرێن ئه‌خلاتى
سینه ژ قه‌ند و نه‌باتى
مێهڤانا من بوو، لێ نه‌هات
2
عارف حیتۆ:
ل دلى به‌هى و خه‌م بوونه شیر
ل جه‌سته‌ى پاله بوون بێ ته‌كبیر
ژ بۆ هه‌ستان نینه ته‌قدیر
له‌و بێده‌نگه و هێژ ل سبات
شه‌مال ئاكره‌یی:
ئیرۆ ل دلى به‌هى و خه‌مه
ئاسمانێ وى مژ و ته‌مه
وه‌لى مه، ئه‌و ژى شه‌مه
هه‌ڕفى ل من ئه‌و كه‌لات
3
عارف حیتۆ:
ل به‌ندا به‌ندیێ به‌نده‌ر
كه‌مالا كه‌رافتى كه‌ده‌ر
ده‌رگه‌هێ ده‌ردێ ده‌ربه‌ده‌ر
كه‌رافت گوهان و كێفه‌رات
شه‌مال ئاكره‌یی:
چاڤ ناوه‌ستن ژ به‌ندا وێ
نا نڤن ب مۆركا خه‌وێ
ژ خه‌یالا وێ مێ كه‌وێ
دلێ من گرتیه شه‌وات
4
عارف حیتۆ:
مینا رۆژێ گه‌رم و شه‌هى
وه‌كو مه‌یێ خۆش و كه‌هى
نۆلا یارا مشت داله‌هى
نه‌هات بێژت ئه‌ڤه ده‌مهات
شه‌مال ئاكره‌یی:
مینا رۆژا ل ئه‌لندێ
دێ هه‌لێت و بێژت به‌ندێ
دێ بهوژم ته‌ڤى ڕندێ
ژبۆ عه‌شقێ دێ كه‌ین سه‌لات
5
عارف حیتۆ:
گوله‌كێ دل ژ من دزى
بلبله‌ك یێ ل سه‌ر ئالزى
ئه‌ڤینه‌كا د دل دا ڕزى
ژین تێكدا یا بووى خه‌رابات
شه‌مال ئاكره‌یی:
ب سه‌مانه گول و بولبول
ژبۆ عه‌شقێ ئه‌ون سومبول
قه‌ت نابه ژ هه‌ڤ ببن سل
غه‌ییدینا وانه مه‌رگه‌سات
6
عارف حیتۆ:
غه‌ییدینا دلبه‌را به‌نگی
ژ من دئێخیت خولك و ڕه‌نگی
عه‌شقا مه تێكدا كر له‌نگی
نه گۆتی نه و نه ل به‌رهات
شه‌مال ئاكره‌یی:
ئه‌ز نه چاكم نه وه‌لی
نه ئه‌زم یێ ژ دۆزێ زه‌لی
لێ هاتنێ ناكه‌ت به‌لی
نه ب په‌یوه‌ندیێ نه ب چات
7
عارف حیتۆ:
چات و په‌یوه‌ندی ب نۆبه‌نه
ل دیدارا وێ تلۆڤه‌نه
ژ بۆ من یێ ل به‌ندێ دۆبه‌نه
د گه‌ل وێ هه‌ر تم سیجالات
شه‌مال ئاكره‌یی:
عه‌قلی ئه‌م خستین سیجالان
به‌رسینگ گرتن و جیدالان
نێزبوو بكه‌ڤین نه‌والان
لێ دل ژ مه‌ڕا بوو نه‌جات
8
عارف حیتۆ:
عه‌قلێ من كه‌فت تێهزرینێ
ل ڤێ شه‌ڤا كه‌وچه‌رینێ
دلێ من یێ دچیت گه‌هینێ
دۆل و نه‌والان گۆت هه‌یهات
شه‌مال ئاكره‌یی:
هه‌یهات و هات ل منێ ژار
ته‌نێ ئه‌وه یارا بژار
هه‌ر ئه‌وه سه‌رپشك و مژار
بۆ وێ یه ئه‌ڤ كار و خه‌بات
9
عارف حیتۆ:
كار و خه‌باتا من هه‌می
ژ پێخه‌مه‌ت یارا ده‌مده‌می
كو بكه‌مه نوورا سه‌رده‌می
لێ ڕێ هه‌رده‌م تاری و زولمات
شه‌مال ئاكره‌یی:
ئه‌و رێیا زولمات و تاری
یا بۆ دكه‌ین خه‌بات و كاری
دێ رۆوهن بیت ب ئێك جاری
گه‌ر نوورا وێ سه‌ر مه‌دا هات
10
عارف حیتۆ:
گه‌ر نوورا وێ تاری ڕه‌ڤاند
جێژڤان و باخچه كه‌ناند
دیداره‌ك ژ دووریێ ڤه‌ژاند
دێ ل مه ڤه‌بن ده‌ر و قه‌نات
شه‌مال ئاكره‌یی:
ده‌ر و قه‌نات ته‌ڤ دێ ڤه‌بن
هه‌مبێز و ویصال دێ هه‌بن
ل باخچه‌یان كه‌و دێ قه‌بن
دێ ب هه‌ڤڕا بین تا مه‌مات
