دلشاد شه‌هاب:تێكگه‌هشتنه‌كا باش ل گه‌ل حوكمه‌تا نوو یا ئیراقی یا هه‌ی
ئه‌ڤرۆ:
شیره‌تكاره‌كێ سه‌رۆكێ هه‌رێما كوردستانێ ڕاگه‌هاند، هه‌رێما كوردستانێ دخوازیت كێشه‌یێن ل گه‌ل به‌غدا هه‌ین بهێنه چاره‌سه‌ركرن و تێكگه‌هشتنه‌كا باش یا هه‌ی ل گه‌ل حوكمه‌تا نوو یا ئیراقێ و خویاكر ژی، بۆ ئه‌مریكا گرنگه پارچه‌بوون ل هه‌رێما كوردستانێ نه‌بیت .
دلشاد شه‌هاب، شیره‌تكارێ سه‌رۆكێ هه‌رێما كوردستانێ، گوت” د كۆمبوونێن ڕۆژێن بۆری دا دناڤبه‌را نێچیرڤان بارزانی، سه‌رۆكێ هه‌رێما كوردستانێ و به‌رپرسێن به‌غدا، باس ل ڕوو ب ڕووبوونا تیرۆرێ، پرسا بودجه‌یا گشتی یا ئیراقێ، قانوونا په‌ترۆلێ و غازێ، پرسا پاراستنا سنووران و چه‌ند بابه‌تێن دی ژی هاته كرن”.
ل ڤێ دووماهیێ كێشه‌یێن د ناڤبه‌را پارتی و ئێكه‌تیێ دا زێده‌تر بوون وبوونه ئه‌گه‌رێ وێ چه‌ندێ كو تیما وه‌زاری یا ئێكه‌تیێ بایكۆتا كۆمبوونێن جڤاتا وه‌زیران بكه‌ت، ب دیتنا دلشاد شه‌هاب” ئه‌مریكا به‌رده‌وام پشته‌ڤانی ل هه‌رێما كوردستانێ كریه، له‌وما ل ده‌ف ئه‌مریكا ئێدی شوونوارێن پارچه‌بوونا هێزێ ل هه‌رێما كوردستانێ نه‌مینیت و پێدڤیه هێزه‌كا پێشمه‌رگه‌ی یا ئێكگرتی هه‌بیت و ئه‌ڤ داخوازیه ب ڕۆهنی ژ سه‌رۆكێ هه‌رێما كوردستانێ كریه”.
گوت ژی” ئه‌مریكا ڕۆلێ نێچیرڤان بارزانی د بزاڤێن وی بۆ پاراستنا ئاشتیێ د ناڤبه‌را پێكهاته‌یێن هه‌رێما كوردستانێ وپاراستنا په‌یوه‌ندیێن د ناڤبه‌را پارتی و ئێكه‌تی و هه‌م بۆ وی ڕۆلێ ژی ئه‌وێ نوكه ل مه‌یدانا سیاسی یا ئیراقێ دگێریت ب بلند دهێته هه‌لسه‌نگاندان”.
ئاماژه‌كر” حوكمه‌تا نوو یا ئیراقێ د قۆناغه‌كا هه‌ستیار دایه، چونكه پشتی ساله‌كێ ژ ئه‌نجامدانا هه‌لبژارتنان یا هاتیه پێكئینان”. باس ل وێ چه‌ندێ ژی كر” بۆ سه‌ركه‌فتنا وێ حوكمه‌تێ پێدڤیه ئاشتیه‌كا گشتی هه‌بیت، پێدڤیه دانپێدان ب مافێن گه‌لێ كوردستانێ هه‌بیت، سه‌قامگیرێ ل ئیراقێ په‌یدا نابیت هه‌كه د چارچۆڤه‌یێ دستووری دا مامه‌له ل گه‌ل هه‌رێما كوردستانێ نه‌هێته كرن، و ئه‌ڤ په‌یامه ب ڕۆهنی ب به‌غدا هاتیه دان”.
شیره‌تكارێ سه‌رۆكێ هه‌رێما كوردستانێ خویاكر ژی” تێكگه‌هشتنه‌كا باش ل دۆر پرۆژێ قانوونا بودجه‌ی ل گه‌ل هه‌رێما كوردستانێ هه‌یه و دانوستاندنه‌كا باش ژی ل سه‌ر هاتیه كرن و دبیت ل چه‌ند ڕۆژێن داهاتی جڤاتا وه‌زیرێن ئیراقێ پرۆژێ قانوونێ په‌سه‌ند بكه‌ت و بۆ جڤاتا نوونه‌ران بهنێریت”.
هه‌روه‌سا گوت” محه‌مه‌د شیاع سودانی یێ پێگیره ل سه‌ر بجهئینانا هه‌موو هوورده‌كاریێن وێ ڕێككه‌فتنا هه‌موو ئالیان ل سه‌ر ئیمزاكری و ل سه‌ر وی بنه‌مایی ژی حوكمه‌تا نوو هاتیه پێكئینان”.
ب باوه‌ریا دلشاد شه‌هابی، د ڕێككه‌فتنا پێكئینانا حوكمه‌تا نوو یا ئیراقێ دا” مافێن گه‌لێ كوردستانێ هاتینه دیاركرن د هه‌موو بواران دا ب تایبه‌ت وان بوارێن كو نوكه ب هه‌لاویستی ماینه، د بوارێ په‌ترۆلێ و غازێ، ل بوارێ هه‌ماهه‌نگیا ئه‌منی، ل بوارێ مافێن هه‌رێما كوردستانێ ژ بودجه‌یا ئیراقێ، ل بوارێ پاراستنا سنووران و پاراستنا سه‌روه‌ریا ئاخێ”.
