دهۆكێ زه‌حمه‌ته‌كا مه‌زن دیت هه‌تا خوه ژ ده‌ستێ ختوت قورتال كرى
ئه‌ڤرۆ نيوز، زنار:
تیما ته‌پا پێ یا یانا دهۆك زه‌حمه‌ته‌كا مه‌زن دیت هه‌تا ده‌رباز بویه یاریا پێش دووماهیا كاسا عیراقێ پشتى ئه‌ڤرۆ د یاریا خوه یا گه‌را هاتنێ دا هه‌مبه‌ر یانا ختوت ب دو گۆلان وه‌كهه‌ڤ بوى د وێ یاریێ دا ئه‌وا ئه‌ڤرۆ ل یاریگه‌ها دهۆك یا وه‌رزشى هاتیه كرن.
د نیڤا ئێكێ دا به‌روڤاژى پێشبینى و روودانێن یاریێ یانا ختوت یاریه‌كا باش ئه‌نجامدا و شیان دو گۆلان د ڤێ نیڤێ دا بكه‌ن و نیڤا ئێكێ ب ڤى ئه‌نجامى ب دووماهى هات.
د نیڤا دویێ دا یانا دهۆك هه‌مى پێشبینى گوهارتن و یاریه‌كا گه‌له‌ك باشتر ئه‌نجامدا و شیان كونترولا یاریگه‌هێ ب ته‌مامى بكه‌ن، ل ده‌قیقه‌یا 52 ژ یاریێ یانا دهۆك شیا ئه‌نجامێ یاریێ كێم بكه‌ت ب ریچكا یاریكه‌رێ خوه كامیران خالد ده‌مێ شیاى گۆلا ئێكێ تومار بكه‌ت و هیڤیێن راستڤه‌كرنا ئه‌نجامێ یاریێ ڤه‌گه‌راندى ل دووڤ دا یاریكه‌رێن دهۆك فشاره‌كا مه‌زن ل سه‌ر گۆلا یانا ختوت په‌یداكر به‌رامبه‌ر یانا مێڤان تنێ به‌ره‌ڤانى ژ گۆلا خوه دكر هه‌تا ده‌قیقه‌یا 90 ژ یاریێ دادڤانێ یاریێ په‌نه‌لتیه‌كا دروست بۆ یانا دهۆك هژمارت ده‌مێ ته‌په ب ده‌ستێ یاریكه‌ره‌كێ یانا ختوت كه‌فتى و د ئه‌نجامدا خالد مشیر شیا گۆلا وه‌كهه‌ڤیێ بۆ یانا خوه تومار بكه‌ت و یارى ب ئه‌نجامێ دو گۆلان بۆ هه‌ردو تیمان ب دووماهى هات.
ب ڤى ئه‌نجامى یانا دهۆك ده‌ربازبونا خوه بۆ قوناغا پێش دووماهیێ مسوگه‌ر كر پشتى مفا ژ ئه‌نجامێ یاریا چوى وه‌رگرتى ده‌مێ ب گۆله‌كێ بێ به‌رامبه‌ر سه‌ركه‌فتى، یانا دهۆك دێ چاڤه‌رێ سه‌ركه‌فتیێ یاریا كه‌رخ و جه‌ویه بیت بۆ یاریا پێش دووماهیێ ئه‌وا بریاره رۆژا پێنج شه‌مبى بهێته كرن.
