دهۆك: ئه‌رد بۆ به‌لاڤكرنێ نينه
ئه‌ڤرۆ نيوز:
رێڤەبەرێ گشتیێ باژێرڤانیێن پارێزگەھا دھۆکێ دیارکر کو 21 ھزار کەسان بەری نوکە رازەمەندی بۆ وەرگرتنا پارچەیێن ئەردی ھەنە و ئەردێ پێدڤی د دەستێ باژێرڤانیێ دا نینە، پێدڤیە ئەرد بھێتە سەر ناڤێ باژێرڤانیی پاشی ل سەر وان کەسێن رازەمەندی ھەی بھێـتە بەلاڤکرن.
ئەندازیار ھەڤال ئەحمەد، رێڤەبەرێ گشتیێ باژێرڤانیێن پارێزگەھا دھۆکێ بۆ ئەڤرۆ دیارکر کو ھندەک ئەگەر ھەنە ئەرد ناھێتە سەر ناڤێ باژێرڤانیێ وەکو ھندەک جاران بۆ نموونە وەزارەتا چاندنێ زوو ب زوو رازی نابیت دەستان ژ ئەردێ چاندنێ بەردەت، چونکو پتریا ئەردێن باژێرڤانی داخواز دکەت ئەو ئەردن یێن بکێر چاندنێ دھێن و گەلەک جاران ژی خۆدانێن مولکی ئەگەرن وان دڤێت ئەردێ وان ھەر ددەستێ وان دا بیت بۆ کارێن چاندنێ ب کاربینن و گۆت: “ئەم ژی زۆرداریێ ل وان ناکەین ھەر دەمێ ئەم بووینە خۆدانێن ئەردی ئەم دێ ھێدی ھێدی دەینە وان کەسێن بەری نوکە رازیبوون ھەی”.
ناڤھاتی ئاماژە دا وێ چەندێ کو بابەتێ بەلاڤکرنا پارچەیێن ئەردی یێ ڤەمایی ھەتا جارەکێ چارەسەریەک دھێتە دیتن، ھەکە ئەرد ھەبیت دێ دووڤ خوە جھیێ وان کەسان ھێتە بەلاڤکرن، دێ ل وێ قەزایێ وەرگریت ھەتا نوکە ل سەرانسەری قەزا و ناحیێن دھۆکێ چو ئەردێ وەسا یێ بەرھەڤ نینە د دەستێ باژێرڤانیێ دا بۆ بەلاڤکرنێ، بەلێ ئەم بەرھەڤیان دکەین ئەردی بدەینە زێندانیێن سیاسی و خێزانێن شەھیدان، ھێشتا ئەرد نەھاتیە بەرھەڤکرن بتنێ ئەم یێ بەرھەڤیان دکەین.
