دهۆك و وەرزەك بۆ ژبیركرنێ
ئیحسان حەسەن
ئەنجامێن فوتبۆلا یانەیا دهۆك ئەوا شیای ل وەرزێ بوری دو ناسناڤان بدەستڤە بینیت، پتر ژ تێبینیەكێ لدەف حەزژێكەر و پشتەڤانێن خوە پەیداكرینە، ئەوێن رۆژ بۆ رۆژێ دلگرانیا وان مەزنتر لێ دهێت، ژبەر وان ئەنجامێن خراب ب تایبەت یێن ڤێ داویێ بدەستڤە ئینان و دوور كەڤتنا وێ ژ هەڤركییێ دخولا ستێرێن ئیراقێ لڤی وەرزی، ئەز دبێژم چاڤدێر و رەخنەكر و هەتا جەماوەرێ تیمێ ژی تا رادیەكێ باش هۆكارێن ڤێ رەوشێ و پاشكەڤتنێ دزانن، چ یێن گرێدای دەستبەردانا وان بەری دەستپێكرنا خولێ ژبەر هەر ئەگەرەكێ ژ هژمارەكا ستونێن سەرەكی یێن تیمێ ل وەرزێ بوری، چ یێن گرێدای نە سەركەڤتنا وان دپێكئینان تیمەكا جیگیر ژ دەستپێكا خولێ تا نها ژبەر گوهۆرینا سێ راهێنەران، هەروەسا دبازارێ كرین و ڤەگوهاستنا یاریزانان هەر لدەستپێكا خولێ و هەتا دڤەگۆهاستنێن هاڤینێ دا ژی، رەنگە هندەك هۆكارێن دی ژی هەبن ، بەلێ دڤێت ئەم بزانین كو دجیهانا فوتبۆلێ دا راستیەك هەیە ئەوژی ئەوە كو تیمێن مەزن ب سالان دهێنە ئاڤاكرن، بەردەوامییا ڤان گوهۆرینان چ ئەنجامێن باش نابن، ژبلی هندێ بارەكێ دارایی یێ مەزن دئێخیتە لسەر ملێن یانەیێ، داكو ئەڤ وەرزە بۆ ژبیركرنێ بیت، ژبەر كو چ هیڤی نەمان كو شەری لسەر بكەت، پێدڤییە كارگێریا یانەیا دهۆك هەر ژ نها نەخشە و پلانەكێ بۆ وەرزێ بهێت بدانیت و كار لسەر بكەت، یا ئێكێ پێداچوونەكا تەكنیكی لسەر تیمێ بكەت و بزانیت كا كیژ یاریزان دێ مینە دگەل تیمێ و كێژ دێ هێنە گوهۆرین، یا دویێ هەر ژ نها دان و ستاندنێ دگەل راهێنەرەكێ خودان ئەزموون و كەسایەتییەكا بهێز بكەت كو بشێت خوە بگونجینیت دگەل فشارێن جەماوەری، یا سێیێ گرێبەستێ ب كێماسی دگەل چار یاریزانێن سوپەر بكەت، ب تایبەت گولپارێز و هێرشبەران، ل شوونا ئینانا هژمارەكا زوور ژ یاریزانێن ئاسایی، بزاڤێ بكەت یاریزانێن خودان كوالێتی بینیت، یا چارێ هە ژنها كار لسەر دابینكرنا سپۆنسەران و بەرهەڤكرنا بودجەیا وەرزێ بهێت بكەت، یا پێنجێ و ژهەمییا گرنكتر ئارمانجا خوە پشتی ڤان پێنگاڤان دەستنیشانبكەت، ژبەر كو دەمێ ئارمانج دیاردبیت فشاران لسەر یاریزان و راهێنەران كێم دبیت، ئارمانج ژی بێ گۆمان پشتی شرۆڤەكرن و خواندنا تیمێن خولێ و رەوشا یانەیێ دهێنە دانان، ئانكو بڤان پێنگاڤان هوون دێ بنە خودانێ دەستپێشخەریێ و هوون دێ بریارێ لسەر پاشەرۆژا تیمێ دەن، ل دووماهییێ یا من دڤێت بێژم بۆ كارگێریا یانەیێ ئەوێن شیاین لڤان سالێن بوریدا دیرۆكێ بۆ وەرزشا پارێزگەهێ ب یاریا ژمارەكا ئێك ل جیهانێ تۆماربكەن، هوون پێدڤی نەشتەگەریەكا زانستی و خوینێن نوونە كو جوداهییێ پەیدابكەن، ژبلی هندێ كار ژبۆ نەهێلانا وان شاشییان بكەن یێن كو لڤی وەرزی كەڤتینە تێدا، ئانكو هەوە پرۆژەك هەبیت بۆ وەرزێ تمام یێ خولێ، بۆ هندێ جارەكا دی ئەلهویێن چیا ڤەگەریتە جهێ خوە یێ دروست.
