ده‌رباره‌ى هاريكاريێن ئابوورى وه‌لاتێن ئورۆپى چ دا ده‌ست بارزانى؟
ئەڤرۆ نیوز:
سەرۆکێ ھەرێما کوردستانێ، ئەڤرۆ د چارچۆڤێ کونفرانسێ ئاسایشا میونخ، د تەوەرەکێ تایبەت دا ب جیوپولیتیک و سیاسەتا نوو ل ڕۆژھەلاتا ناڤین دا، دێ پانێلەکی پێشکەش کەت.
سەرۆکێ ھەرێما کوردستانێ مەسعود بارزانی ل رۆژا 11 ڤێ مەھێ بۆ پشکداریکرن د کونفرانسێ ئاسایشێ یێ نێڤدەولەتی دا ل میونخ، سەرەدانا ئەلمانیا کر و چەندین دیدار و کۆمبوون ل گەل سەرکردێن جیھانی ئەنجامدان و تێدا سیاسەتا ھەرێما کوردستانێ ل دۆر شەڕێ دژی داعشێ و دووماھی پێشھاتێن سیاسی و ئەمنی ل دەڤەرێ، ھەروەسا قەیرانا دارایی و ڕیفراندۆم ھاتە بەحسکرن.
ل دووڤ سایتێ سەرۆکاتیا ھەرێما کوردستانێ، ل رۆژا 12 ڤێ مەھێ، سەرۆک بارزانی ل گەل حەیدەر عەبادی سەرۆک وەزیرێن عیراقێ کۆمبوو و تێدا بەحسێ پەیوەندیێن بەغدا و ھەولێرێ ھاتە کرن و بریار ھاتە دان دانوستاندن د ناڤبەرا ھەردو لایەناندا د بەردەوام بن.
ل ھەمان رۆژ، سەرۆکێ ھەرێمێ پێشوازی ل وەزیرێ بەرگریا فرەنسا (ژان لودریان) کر و تێدا بەحسێ ھاریکاریێن لەشکری یێن فرەنسا بۆ ھەرێمێ ھاتە کرن، سەرۆک بارزانی بەحسێ ڕەوشا مەیدانی یا بەرەیێن شەڕێ داعشێ و ڕیفراندۆمێ و قەیرانا دارایی یا ھەرێمێ و مەترسیا وێ قەیرانی ل سەر بوارێن جودا ل ھەرێمێ کر، دیسا سەرۆک بارزانی سەرەدانا عەبدوللایێ دویێ شاھێ ئوردنێ کر، ھەر د ھەمان رۆژ دا ژی پێشوازی ل (سەلام تەمام) سەرۆک وەزیرێن لوبنانێ و (پاولۆ جینتیلۆنی) وەزیرێ دەرڤەیێ ئیتالیا کر، د وێ دیدارێ دا بەحسێ سکرێ مووسل و ئەو مەترسیێن گرێدای وی سکری ڤە ھاتە کرن و سەرۆک بارزانی خوەشحالیا خوە دیارکر کو کۆمپانیەکا ئیتالی یا بەردەوامە د کارێ چاڤدێریێ و پێشکێشکرنا ھاریکاریان بۆ وێ چەندێ سکرێ مووسل خوە ل بەرامبەر مەترسیێن ل سەر ژێرخانا سکری بگریت، دیسا سەرۆک بازرانی پێشوازی ل (فیلیپ ھامۆند) وەزیرێ دەرڤەیێ بریتانیا کر، دیسا ل گەل مەولوود چاوش ئوگلۆ وەزیرێ دەرڤەیێ تورکیا کۆمبوو.
دوھی و ھەر د چارچۆڤێ پشکداریا وی د کونفرانسێ میونخ دا، سەرۆک بارزانی ل گەل (گورگی ئیڤانۆڤ) سەرۆکێ مەقدونیا کۆمبوو، دیسا بریارە ل رۆژێن داھاتی، سەرۆک بارزانی چەندین دیدار و کۆمبوونان ل گەل سەرکردێن جیھانێ ل میونخ ئەنجام بدەت.
فوئاد حسێن سەرۆکێ دیوانا سەرۆکاتیا ھەرێمێ د داخۆیانیەکا رۆژنامەڤانی دا گوت” د پتریا کۆمبوونان دا، سەرۆک بارزانی داخوازا ھاریکاریێن دارایی و لەشکری بۆ ھەرێمێ کر و بەرپرسێن وەلاتان ژی بەرھەڤیا خوە بۆ پێشکەشکرنا وان ھاریکاریان دیارکر”.
