ده‌ستكارى د پاشكه‌فتكرنا مووچان دا دێ ب ڤى شێوه‌ى بيت
ئه‌ڤرۆنيوز:
وه‌زاره‌تا دارايى وئابوورى ل هه‌رێما كوردستانێ مژوولى ڤه‌كۆلينه‌كێ يه بۆ چاوانيا ده‌ستكاريكرنێ دمووچێ فه‌رمانبه‌رێن هه‌رێما كوردستانێ دا.
ل دووڤ وێ ڤه‌كۆلينێ، ئه‌و كوژمێ پاره‌ى كو ژ به‌غدا بۆ مووچێ فه‌رمانبه‌ران دهێته هنارتن، ل گه‌ل داهاتێ په‌ترۆلێ وداهاتێ ناڤخوه‌يى،رێژا پاشكه‌فتكرنا مووچێ فه‌رمانبه‌ران دێ هێته كێمكرن ووه‌كو نوكه نامينيت.
ل دووڤ پێزانينان، وه‌كو باسنيوز به‌لاڤكرى، كێمترين رێژا پاشكه‌فتكرنێ دێ 10% بيت، بۆ نموونه هه‌كه مووچێ كه‌سه‌كى 500 هزار دينار بن، دێ 50 هزار دينار ژێ هێنه برين وزوورترين رێژا پاشكه‌فتكرنێ ژى دێ بيته 30%، دده‌مه‌كى دا ل دووڤ بريارا پاشكه‌فتكرنێ كو ل شوباتا 2016 وهه‌تا نوكه دهيته بجهئينان، زوورترين رێژا پاشكه‌فتكرنێ تاكو 70% يه.
دراگه‌هاندنه‌كا وه‌زاره‌تا دارايى دا كو ل 18/3/2018 هاتيه به‌لاڤكرن، دياركريه”دده‌مه‌كى دا مووچێ مووچه‌خۆرێن هه‌رێما كوردستانێ بێ پاشكه‌فتكرن پێدڤى ب 900 مليار دينارايه، به‌لێ حوكمه‌تا عيراقێ كوژمێ 317 مليار و540 مليۆن و465 هزار دينار بۆ شايستێت دارايى يێن هه‌موو مووچه‌خۆرێن هه‌رێما كوردستانێ ب مووچێ پێشمه‌رگه‌ى ژى ڤه يێن مه‌زاختين”.
نورى عوسمان، جێگرێ سه‌رۆكێ فه‌رمانگه‌ها هه‌ماهه‌نگيێ ودووڤچوونێ ل جڤاتا وه‌زيران بۆ باس دياركر كو ده‌ستهه‌لاتا جڤاتا وه‌زيرانه پێداچوونێ ب رێژا پاشكه‌فتكرنا مووچێ فه‌رمانبه‌ران دا بكه‌ت وگۆت” وه‌زاره‌تا دارايى مژوولى ڤه‌كۆلينه‌كێ يه بۆ پرسا پێداچوونێ دمووچه‌ى دا ب گۆره‌ى ئه‌و داهاتێ دده‌ستێ حوكمه‌تێ دا، نزانم ژى كا ئه‌و ڤه‌كۆلينه ب دووماهى هاتيه يان نه”.
رۆهنكر ژى” ل دووڤ ره‌وشا دارايى وسياسى دێ پێداچوون دمووچه‌ى دا هێته كرن”.
ل دۆر كێمترين رێژا پاشكه‌فتكرنێ ئايا دێ 10% بيت وزوورترين رێژه ژى دێ 30% بيت، نورى عوسمان گۆت” هه‌تا نوكه ئه‌و رێژه‌يه ئێكلا نه‌بوويه، به‌لێ ب پشت راستى ڤه دبێژم ئه‌وا دبه‌رژه‌وه‌نديا فه‌رمانبه‌ران دا بيت، دێ حوكمه‌ت بريارێ ل سه‌ر ده‌ت”.
ل دووڤ ئامارێن وه‌زاره‌تا دارايى، سيسته‌مێ نوكه يێ يێ پاشكه‌فتكرنێ، هه‌رێما كوردستانێ هه‌يڤانه پێدڤى ب 590 مليار دينارايه بۆ مووچه‌ى.