ده‌ميرتاش: دڤێت PKK بێ شەرت و مەرج ھێرشێن خوە ب تەمامی رابگریت
ئەڤرۆ نيوز:
ھەڤسەرۆکێ HDP د داخۆیانیەکی دا راگەھاند کو دڤێت PKK بێ شەرت و مەرج ھێرشێن خوە ل باژێر و چیایان بدەتە راوەستاندن و دیار کر حسابێن شەرێ کرێت و سیاسەتا تاری یا ئاکپارتی ب کوشتنا سەرباز و پۆلیسان ناھێتە پرسین و تۆلا ھەری مەزن ب دروستکرنا ئاشتیێ و راوەستاندنا ھێرشان ئەم دشێین ژ ئەردۆگانی و حوکمەتا ئاکپارتی ب پرسین.
سەلاحەدین دەمیرتاش ھەڤسەرۆکێ پارتا دیمۆکراسیا گەلان HDP ل باژێرێ ئیزمیر یێ تورکیا کۆمبوونەکا بەرفرەە یا جەماوەری سازکر و ل سەر رەوشا تورکیا و باکورێ کوردستانێ راوەستیا و راگەھاند کو مخابن تورکیا بەر ب شەرەکی دژوار یێ ناڤخوەیێ ڤە دچیت و ئەڤ شەرە دێ کارتێکرنەکا خراب ل ھەموو وەلاتیێن تورکیا بکەت و گۆت: (حوکمەتا ئاکپارتی ب سەرکێشیا سەرۆک کۆمار ئەردۆگانی وەلاتی رۆژ ب رۆژی دکەتە د ناڤ شەرێ ناڤخوەیی دا و رۆژانە ب دەھان لاوێن کورد و تورک دھێنە کوشتن و دڤێت ھەموو ئاشتیخواز، دیمۆکراسیخواز و دژبەرێن شەری دەنگێن خوە بۆ راوەستاندنا شەری بلند بکەن و ئەم ھەموو پێکڤە ئاگرێ مەترسیدار ڤەمرینین).
دەمیرتاشی د پشکەکا دی یا ئاخڤتنا خوە دا ژی ل سەر بەلاڤبوون و دژواربوونا ھێرشێن PKK ل باژێرێن تورکیا و باکورێ کوردستانێ ژی راوەستیا و دیار کر کۆ راستە شەرێ کو ئەڤرۆ دھێتە کرن ژ ئەنجاما سیاسەتا کرێت و تاری یا ئاکپارتی و سەرۆک کۆمارێ تورکیا دوبارە دەستپێ کریە و گۆت: (ئەردۆگان و ئاکپارتی وەلات وێران کرینە و رۆژانە ئاگرێ کو ژ ئالیێ دەستھەلاتداران ڤە ھاتیە ھەلکرن مە ھەموویان دسۆتینیت و دڤێت PKK ژی ئێدی دەست ژ ھێرشێن ل ناڤ باژێران و چیایان بەردەت و نابیت باجێ سیاسەتا شاش و تاری و شەرێ کرێت یا حوکمەتێ سەرباز و پۆلیس ئانکۆ لاوێن کورد و تورک بدەن و داخواز ژ PKK دکەم بێ شەرت و مەرج شەری راوەستینیت و دەست ژ چالاکیێن پەقاندنان بەردەت، ژ بەر کو ب کوشتنا پۆلیس و سەربازان پرس ناھێتە چارەکرن).
ھەروەسا ھەڤسەرۆکێ HDP راگەھاند ژی کو دڤێت ھەموو تاخ و چینێن جڤاکێ تورکیا و باکورێ کوردستان، ب تایبەت ژی رەوشەنبیر، نڤیسەر، رۆژنامەڤان، ئەکادیمی، ئاشتیخواز، دیمۆکراسیخواز و دژبەرێن شەری بۆ راوەستاندنا شەر و چارەکرنا پرسگرێکا کوردی ب ئاشتی و دانوستاندنان دەنگێ خوە بلند بکەن و ل دژی شەری بەرەیێ ئاشتیێ ب ھێز کەن و گۆت: (ئەز جارەکا دی دبێژم مخابن حوکمەت ئانکۆ دەستھەلاتدارێن تورکیا وەلات بەر ب شەرێ ناڤخوەیی ڤە دبەن و ئەڤ شەرە دێ ھەموو تورکیا ژناڤ بەت و دێ ھەموو ئالی زرارمەندێن شەری بن، ڤێجا دەم دەمێ بلندکرنا ئالا ئاشتیێیە و تورکیا ب تنێ ئاشتی و دیالۆگێ دشێت ل سەر پیان بمینیت و پرسا کورد و پرسێن دی چارە بکەت و ژ بلی ڤێ یەکێ ھەموو رێ و رێبازێن دی دێ خزمەتا وێرانکرن و شەرێ ناڤخوەیی کەن).
د داویا ئاخڤتنا خوە دا ژی دەمیرتاشی سەرنج راکێشا سەر ھێرشێن دەولەتا تورکیا و ھێزێن تیرۆرست یێن ئەلنوسرا، سولتان موراد، ئەحرار شام و داعشێ بۆ سەر گوند و باژێرێن رۆژئاڤایێ کوردستانێ و گۆت: (مە ھێڤی دکر دەستھەلاتدارێن تورکیا سەربۆرێ ژ دیرۆکێ وەربگرن و ببنە ھێزا ئاشتیێ ل رۆژھەلاتا ناڤین، لێ مخابن دەستھەلاتدارێن تورکیا خوە کرنە پشکەک ژ شەرێ ل سووریێ و ل بەر چاڤێن جیھانێ پشتەڤانیا کۆمێن تیرۆرست دکەن و گوند و باژێرکێن رۆژئاڤایێ کوردستانێ ددەتە بەر تۆپان و فرۆکێن شەر یێن وان ژی کوردان بۆمبەباران دکەن و جارەکا دی بانگ ل حوکمەتا تورکیا دکەم کو دەست ژ تۆپبارانکرن و بۆمبەباران کرنا ئاخا رۆژئاڤایێ کوردستانێ بەردەن و تانک و سەرباز و ھێزێن خوە یێن تایبەت ژ رۆژئاڤا ڤەکێشینن، ھەکە نە مەترسیا وێ یەکێ ھەیە کو تورکیا ببیتە قادا شەرێن دژوار و شەرێ سووریا ژی ڤەگوھێزیتە ناڤ ئاخا تورکیا و باکورێ کوردستانێ. دیسان داخواز ژ ئەمریکا، جڤاتا ئاسایشا نێڤدەولەتی، یەکیتیا ئورۆپا و نەتەوێن یەکگرتی دکەم کو فشارێن بێخنە سەر تورکیا دا کو دەست ژ ھێرشێن بۆ سەر ئاخا رۆژئاڤایێ کوردستانێ بەردەت).
