ده‌ميرتاش: رێ ناده‌ين قووناغا ئاشتيێ تێك بچيت
ئه‌ڤرۆ نيوز:
سه‌لاحه‌ين ده‌ميرتاش راگه‌هاند: هه‌ده‌پێ باوه‌رى يا ب ئاشتيێ هه‌يى و رێ ناده‌ين قووناغا چاره‌سه‌رى و ئاشتيێ تێك بچيت.
سه‌لاحه‌دين ده‌ميرتاش، هه‌ڤسه‌رۆكێ گشتيێ پارتيا ديموكراتا گه‌لان “هه‌ده‌په” د كۆمبوونا جه‌ماوه‌رى يا پارتيا وى دا بۆ بانگه‌شه‌يا هه‌لبژارتنێن په‌رله‌مانێ توركيا ئه‌وا بڕياره ل 7ى خزيرانا ئه‌ڤ ساله ب رێڤه بچيت ل باژێرێ بينگۆلێ ل باكوورێ كوردستانێ گۆتاره‌ك پێشكێش كر و راگه‌هاند: پارتيا وان دادپه‌روه‌رى و وه‌كهه‌ڤى و براتى و ئاشتى دڤێت.
گۆتژى: “بلا هه‌وه چو گۆمان نه‌بيت، هه‌ده‌په دێ ئاشتيێ ل وه‌لاتى دامه‌زرينيت و رێ ناده‌ت قووناغا چاره‌سه‌رى و ئاشتيێ تێكبچيت و هه‌ده‌پێ باوه‌ريا ب ئاشتيێ هه‌يى و رێ ب دروستبوونا شه‌رى ناده‌ت”.
ده‌ميرتاش ره‌خنه ل ئاك پارتى ژى گرت و گۆت: “ئاك پارتى ره‌وشێ تێك دده‌ت و پێنگاڤان به‌ر ب پاشڤه دهاڤێت، به‌لێ قووناغا چاره‌سه‌ريێ ب سه‌ركه‌فتنا هه‌ده‌پێ و ب ره‌نگه‌كێ ب هێز و ب له‌ز دێ يا به‌رده‌وام بيت و به‌ر ب پێشڤه چيت”.