ده‌ميرتاش: پێدڤيه په‌كه‌كه چه‌كى بدانيت
ئه‌ڤرۆ نيوز:
هه‌ڤسه‌رۆكێ هه‌ده‌پێ راگه‌هاند كو پێدڤيه په‌كه‌كه چه‌كى بدانيت، سه‌ره‌رايى وێ چه‌ندێ كو ئه‌وان به‌رنامێ پارچه‌كرن و جودا بووينا ژ توركيا نينه.
ب گۆره‌يى ئاژانسا ئه‌نادۆل، سه‌لاحه‌دين ده‌ميرتاش، هه‌ڤسه‌رۆكێ هه‌ده‌پێ و په‌رله‌مانتارێ توركيا، ل ده‌مێ پشكداريكرن د كه‌نالێ خه‌به‌رتورك دا، راگه‌هاند: ل جهێ سۆپايێ توركيا بچيته باكوورێ سوريا، بلا سياسه‌تمه‌دار بچن.
سه‌لاحه‌دين ده‌ميرتاش وه‌سان دبينيت كو پاراستنا ئاسايشا سنورێن توركيا ل ژێر سيبه‌را هه‌بوونا په‌يه‌دێ ل رۆژئاڤايێ كوردستانێ “دێ ب ساناهيتر بيت” و پێدڤى دزانيت، كو په‌يه‌ده وێ چه‌ندێ بزاتيت “بێ توركيا نابيت و پێدڤيه چاره‌سه‌ريا توركيا و په‌يه‌دێ خزمه‌تا سوريا نوو بكه‌ت”.
هه‌ڤسه‌رۆكێ هه‌ده‌پێ به‌حس ل بنه‌مايێن پارتيا خوه كر بۆ چاره‌كرنا پرسا كوردان ل باكوورێ كوردستانێ و توركيا و راگه‌هاند: “به‌رنامێ كوردان دابه‌شكرن و جودابوون ژ توركيا نينه، به‌لكو دڤێت دووماهيێ ب وێ نه‌حه‌قيێ بينن، نابێژين بلا ده‌وله‌ته‌كا جودا ب دامه‌زرينين، به‌لكو دبێژين دا پێكڤه بژين، به‌لێ بازنێ ئازاديێ زێده‌تر لێ بكه‌ين”.
ده‌ميرتاش وه‌سان دبينيت بانگه‌وازا وان بۆ په‌كه‌كێ دا چه‌كى بدانيت “چاره‌سه‌ر نينه، هه‌كه‌ر نه “سوبه‌هى هه‌تا ئێڤارى دێ هه‌وار كه‌ين و ل ڤێره ژى دێ هه‌وار كه‌م و بێژم پێدڤيه په‌كه‌كه ل دژى توركيا چه‌كى ب دانيت”.
