دووماهى داخۆيانا جه‌بار ياوه‌ر ل دۆر چوونا پێشمه‌رگه‌ى بۆ ناڤ مووسل
ئه‌ڤرۆ نيوز:
ئەمیندارێ گشتیێ وەزارەتا پێشمەرگەی ئاشکراکر، ھەکە داوخواز ژ ھێزێن پێشمەرگەی ب ھێتەکرن و فەرماندێ گشتیێ فەرماندەیا زێرڤانێن ھەرێما کوردستانێ فەرمانێ بۆمە دەربکەت، ئەڤە پێشمەرگە یێ بەرھەڤە پشکداریێ د ھەر پڕۆسەکا لەشکری دا بکەت، و دیارکر ھێشتا عێراقێ داخواز ژ ھەرێما کوردستانێ نەکریە پێشمەرگە ب چیتە ناڤا باژێڕێ مووسل.
جەبار یاوەر، ئەمیندارێ گشتیێ وەزارەتا پێشمەرگەی بۆ رۆژناما ئەڤرۆ گۆت” ھێشتا داخواز ژ مە نەھاتیەکرن وەک ھەرێما پێشمەرگە پشکداریێ لشەڕێ ناڤا باژێڕی َمووسل دا بکەت، بەلێ ھەکە داخوازەکا بوی شێوەی ژ وەزارەتا پێشمەرگەی ب ھێتەکرن، ئەڤە پێدڤیە فەرماندێن پێشمەرگەی ل گەل فەرماندەیێن وەزارەتا بەڕەڤانیا عێراق دانوستانان بکەن، و پشتی ھنگی فەرمان ژلایێ فەرماندارێ گشتیێ زێرەڤانێن ھەرێما کوردستانێ کو ئەو ئەوژی مەسعود بارزانیە بۆمە بھێت، ئەڤە وی دەمی ھێزا پێشمەرگەی یا بەرھەڤە پشکداریێ لشەڕێ ناڤا باژێڕێ مووسل دا بکەت، ھەکە فەرمان ژلایێ مەسعود بارزانی بۆ پشکداریکرنێ لھەر پڕۆسەکا لەشکری دا لەھەرجھەکی بیت دەربچیت ئەڤە دێ فەرمان ھێتە بجھئینان و ئەم لەشکرین بتنێ فەرمان ب جھدئینین.
جەبار یاوەر گۆتژی” بۆ پشکداریکرنا ھێزا پێشمەرگەی ل شەڕێ گرتنا مووسڵ، پێدڤیە ژبلی رازیبوونا ھەرێما کوردستانێ ھەڤپەیمان ژی بەرھەڤبن بۆ ئەڤێ رێککەفتنێ ھەکە ب ھێتەکرن، نوکە ئۆپەڕاسیۆن یا بیرکاری برێڤەدچیت و ئەم چاڤەڕێی ئەنجامێن وی شەڕی دکەین، چونکو پێنگاڤا دەستپێکێ گورەی رێککەفتنا ناڤبەرا ھەرێم و عێراقێ پێشمەرگە پشکداربوویە و جھێن بۆھاتینە دیارکرن ھەموو ھاتینە کۆنتڕۆڵکرن.
لدۆر گەفێن حەشدا شەعبی ئەمیندارێ گشتیێ وەزارەتا پێمشەرگەی دیارکر” پێشمەرگە دوژمنێ چو ھێزێن عێراقی و جیھانی نینە، پێشمەرگە ئەڤە دو سالە شەڕێ تیرۆرستان دکەت، و دەڤەرێن کوردستانی یاقژکرینە و دپارێزیت نەک فەرماندەکێ حەشدا شەعبی ھەرێما کوردستانێ گەفا ل چو ھێز و لایەنەکی قەبوول ناکەت، و دڤێت ھەرئێک سنورێ خوە بزانیت، ژبەرکو مە چو ئاریشە ل گەل حەشدا شەعبی نینە و ھێزا پێشمەرگەی یا ھەڤکارە ل گەل ھێزێن عێراقی بۆ شەڕێ داعش، ئەف داخویانیێن دھێنەدان لدۆر ھەرێما کوردستانێ و پێشمەرگەی ژلایێ ھندەک فەرماندێن شیعی ل گەل ھەماھەنگیا ھەرێم و عێراقێ ناگونجن.
