دووماهى داخۆيانيا په‌روه‌ردێ ل سه‌ر بهێنڤه‌دانێن ئادارێ ل پارێزگه‌ها دهۆكێ
ئه‌ڤرۆ نيوز، شه‌وكه‌ت محه‌مه‌د سالح:
رێڤه‌به‌رێ گشتيێ په‌روه‌ردا پارێزگه‌ها دهۆكێ راگه‌هاند كو ل سنورێ پارێزگه‌ها دهۆكێ هنده‌ك په‌وروه‌رده دێ پێگريێ ب بهێنڤه‌دانێن فه‌رمى يێن هاتينه راگه‌هاندن كه‌ن و هنده‌ك ژى دێ ده‌وامێ كه‌ن و هنده‌ك په‌وه‌رده ژى دێ هاڤينێ ژى ده‌وامێ كه‌ن.
عه‌بد يوسف، رێڤه‌به‌رێ گشتيێ په‌روه‌ردا پارێزگه‌ها دهۆكێ، بۆ ئه‌ڤرۆ نيوز گۆت: “ژ به‌ر كو ل پارێزگه‌ها دهۆكێ ژ به‌ر هاتنا وێ رێژا زۆرا ئاواران و بنه‌جهكرنا وان د ئاڤاهيێن په‌روه‌ردێ دا، ده‌وام ل سنورێ هنده‌ك په‌روه‌ردان گه‌له‌ك هاتبوو گيرۆ كرن”.
زێده‌تر گۆت: “ژ به‌ر هندێ ژى وه‌زيرێ په‌وره‌دێ رێ دايه مه ل دووڤ پێدڤياتيێ ده‌ستكاريێ د وان بهێن ڤه‌دانان دا بكه‌ين يێن بۆ وه‌زاره‌تا په‌روه‌ردێ دهێنه ده‌ستنيشانكرن دا كو ده‌وام گه‌له‌ك ژ قوتابيان نه‌چيت و زيان نه‌گه‌هيتێ”.
رێڤه‌به‌رێ گشتيێ په‌روه‌ردا پارێزگه‌ها دهۆكێ خۆيا كر كو ژ به‌ر وان ئه‌گه‌ران ئه‌وان بڕيار دا هه‌ر ئێك ژ په‌روه‌ردێن تلكێف و سێمێل و دهۆك رۆژهه‌لات و رۆژئاڤا ل گه‌ل زاخۆ پێگريێ ب وان بهێنڤه‌دانێن ده‌ستنيشانكرى نه‌كه‌ن و ب تنێ دێ رۆژێن 11 و 21 و 22 و 23 بهێن ڤه‌دانێن وان بن و گۆت: “په‌وره‌ردێن ئامێديێ و شێخان و ئاكرێ و به‌رده‌ره‌ش دێ پێگريێ ب بهێنڤه‌دانێن فه‌رمى كه‌ن”.
ئه‌ڤرۆ ئاخفتنكه‌رێ ب ناڤێ وه‌زاره‌تا په‌روه‌ردێ ل حوكمه‌تا هه‌رێما كوردستانێ راگه‌هاند كو ژ 3.11 هه‌تا 2015.3.23 بهێنڤه‌دانا فه‌رمى يه و رۆژا 24 ده‌واما فه‌رمى يه.
رێڤه‌به‌رێ گشتيێ په‌روه‌ردا پارێزگه‌ها دهۆكێ ئاماژه ب وێ چه‌ندێ ژى كر كو ل ئه‌وان ده‌ڤه‌رێن نوكه شه‌ر لێ وه‌كو په‌روه‌ردێن شنگال و وان ده‌ڤه‌ران هاڤينێ ژى دێ ده‌وامێ كه‌ن دا كو ده‌واما وان يا فه‌رمى ژێ نه‌چيت.
