دووماهى پێزانين ل سه‌ر به‌لاڤكرنا پارچێن ئه‌ردى
ئه‌ڤرۆ نيوز:
بەرپرسەکێ حوکمەتا ھەرێما کوردستانێ دیار کر کو ئەو ئەردێ بەرھەڤ بۆ بەلاڤکرنێ بەھرا ھەموو وەلاتیان ناکەت، لەو ب گەر گەرە و ل دووڤ خالان ل سەر وەلاتی و فەرمانبەرێن ھەتا نوکە مفادار نەبووین و گۆت: “چاڤەرێی بڕیار سەرۆکاتیا جڤاتا وەزیرێن ھەرێمێینە بۆ بەلاڤکرنا وان”.
سلێمان خالد بارزانی، سەرۆکێ لژنا باژێڕڤانی ل جڤاتا پارێزگەھا ھەولێرێ بۆ رۆژناما ئەڤرۆ ئاشکرا کر، ئەو پێزانینێن وەزیرا باژێڕڤانی و گەشت و گۆزارێ ل دۆر بەلاڤکرنا پارچێن ئەردی ل سەر وەلاتی و فەرمانبەران دا بەلاڤکرین، حوکمەتا ھەرێما کوردستانێ ھەتا نوکە چو پێزانینێن دی ئاشکرا نەکرینە و گۆت: “ب تنێ وەزیرا باژێڕڤانی و گەشت و گۆزارێ ئاماژە ب بەلاڤکرنا پارچێن ئەردی کریە، دیسا ب رێیا وەزارەتێن پەیوەندیدار ئامارەک بۆ وەلاتیێن کرێدار و فەرمانبەران ھاتیە دروستکرن و تۆمارکرن و بۆ سەرۆکایەتیا جڤاتا وەزیران ھاتیە بلندکرن، دا کو ب مەرەما دانا پارچێن ئەردی بۆ وان بڕیار ل سەر بھێتەدان”.
گۆتژی: “ئەز ب خوە دبێژم ھەتا بڕیار ل سەر نەھێتە دان، جھێ دلخۆشیێ نینە، چونکو کۆمکرنا پێزانینان و دروستکرنا ئامارێ چو مفا نینە، بەلکو بڕیار د دەستێ سەرۆکاتیا جڤاتا وەزیران دایە بۆ بەلاڤکرنێ، ھەردەمێ بڕیار ل سەر بەلاڤکرنا ئەردی ھاتەدان، وی دەمی دێ بزاڤێن بەلاڤکرنێ ھێنەکرن”.
سلێمانی ئاماژە ب وێ چەندێ ژی کر، ئەگەر بڕیارا بەلاڤکرنا ئەردی بھێتە دەرکرن، ب تنێ دێ ئەو ئەردێ بەرھەڤ ل سنوورێ باژێڕڤانیان دێ ھێتە بەلاڤکرن و گۆت: “ئەو ئەردێ بەرھەڤ بۆ بەلاڤکرنێ بەھرا ھەموو وەلاتی و فەرمانبەرێن مفادارنەبووین ناکەت، لەو دێ ل دووڤ خالان بیت و کێ پتر خال ھەنە جارا ئێکێ ئەو دێ چیتە د لیستا بەلاڤکرنا پارچێن ئەردی دا”.
