دووماهیا تیرمەهێ و دەستپێكا تەباخێ
غیاس خـالد زێباری
ل داویا تیرمەها سالا 1983 یێ رژێما گۆر ب گۆر و ستەماكا بەعسا ئیراقێ دوور ل هەمی رەوشتێن مرۆڤایەتی و ئایینی هەشت هزار كوردێن بارزانیێن بێگونەهـ دەستەسەركرن و پاشی دیاربوو، ب رەنگەكێ هۆڤانەتر ل بیابانێن ئیراقێ بنئاخ و شەهیدكرینە، ئەڤە دەسپێكا كۆمەلكوژیێن رژێما بەعسا ئیراقێ بوو بەرانبەر خەلكێ سڤیلێ كوردستانێ، كۆ پاشی تاوانێن مەزنتر ل دویڤ خوە ئینانا مینا ئەنفال و كیمیا بارانكرنێ ئەوێن بووینە ئەگەرێ شەهیدبوون و بێ سەر و شوونكرنا نێزیكی دوسەد هزاران . ل 3/8/2014 ێ ژی گرۆپێ تیرۆرستیێ بناڤێ داعش ل شنگال و دۆرماندۆرێن وێ ب هزاران كوردێن ئێزدی، هۆڤانەتر ل رژێما بەعس، ب هزاران زارۆك و گەنج و پیرڤە، شەهید كرن و مەزنترین زۆرداری و بێ رەوشتیا ڤی سەردەمی ل گەل هاتەكرن و گەهشتە ئاستێ پێ بازرگانیكرنێ. ئەڤ هەردو تاوانە ژ تاوانێن قركرنێ یێن دژی هەمی بنەمایێن ئایینی و مرۆڤایەتیێنە . ئەوا جهێ پسیارێ، ئەرێ ل سەر ئاستێ جیهانێ چ جڤاك و وەلات و سازیێن مرۆڤایەتیێن نیڤدەولەتی ب ئەركێ خوە رابۆن، بۆ قەرەبۆكرنا زیان ڤێكەفتیێن ڤان جینۆسایدان. یان چ وەلات ل سەر ڤان تاوانێن مەزنێن ل دژی كوردان هەلوەستێن ب كریار هەبوون بۆ دادگەهكرنا وان تاوانباران، ئەگەر چ هەلوەست ژی هەبن، نە ژبەر چاڤێن گەلێ كورد بوویە بەلكی بۆ هندەك بەرژەوەندێن خوە بوویە. راستە حوكمەتا هەرێما كوردستانێ ل دووڤ شیانان درێغی نەكریە بۆ هاریكاریا ماڵباتێن وان و رزگاركرنا گرتی و بێ سەر و شوونێن ئێزدی و ڤەگەریانا رۆفاتێن بارزانیان، كو ئەركێ سازیێن نیڤدەولەتی یە، ب تایبەت حوكمەتا ئیراقێ. لەوما پێدڤیە ئالیێن سیاسی یێن كوردستانێ ب ڤان هەلكەفتێن خەمناك، ل چارچووڤەیێ بەیانناما و رێ و رەسمێن تایبەت دەر بكەڤن و ب كریار بەر ب هەرێمەكا بهێز بچن ب هەمی دەستهەلاتداریان ڤە، لەزێ ل كاراكرنا پەرلەمانی و پێكئینانا حوكمەتێ بكەن، چونكی كوردستانەكا ب هێز و ئێكرێزیا ئالیێن كوردستانی یێن نشتیمانی، تاكە گرەنتیا پاراستن و قەڕەبۆكرنا زیان ڤێكەفتیێن كوردستانێ یە، ب تایبەت ماڵباتێن قوربانیێن جینۆسایدكرنێن بارزانیان و ئێزدیان . سەربۆر دبێژنە مە چ جاران چاڤەرێ پاداشتا ل دەرڤەری كوردستانێ نەبن، ب سازیێن نیڤدەولەتیڤە، چونكی ئەڤرۆ بەرژەوەندی و ئابوورێ بهێز بریارێن ئێكلاكەر د بەرژەوەندیا خوە دا بدەستڤەدئینیت، هەر وەكی كورد دبێژین، رەشۆ و دەستێن خۆ.
