دووه‌مین پێشانگه‌ها فۆتۆگرافه‌رێ کورد “سووه‌ر” ل بەلجیکا!
پێشانگه‌ها دوویێ یا فۆتۆگرافه‌رێ کورد “مه‌حمه‌ت ماسوم سووه‌ر” یا ل ده‌رڤەی وه‌لاتی ل پایته‌ختێ به‌لجیکایێ ل بروکسێلێ د ناڤبه‌را رۆژێن 17 و 21ێ ئیلۆنێدا د هه‌فتییا چاندا کوردی دا ڤه‌دبیت. د پێشانگه‌ها “مه‌حمه‌ت ماسوم سووه‌ر” یا ل بروکسێلێ د هه‌فتییا چاندا کوردیدا ، ژ باژێرێن ئامه‌د، وان، مێردین و هه‌سکێفێ و ژ چالاکیێن چاندی، هونه‌ری و سیاسی 31 وێنه دێ جهـ بگرن. سووه‌ر، هه‌تا نوکە 12 پێشانگه‌ه ڤه‌کرنه و پێشانگه‌ها وی یا ئێکەمین یا ل ده‌رڤه‌ی وه‌لاتی به‌رێ دو سالا ل ئەمریکایێ ڤه‌ببوو. سووه‌ر، ل باشورێ کوردستانێ ژی ل دهۆک، سلێمانی، ڕانیا، هه‌ولێر و مەخموورێ ب ته‌ڤاهی 6 پێشانگه‌هـ ڤه‌کرینە. هه‌فتییا چاندا کورد یا ئێکه‌مین ژ لایێ 16 سازیێن کورد و به‌لچیکی هاته ئاماده کرن. چالاکیێن هه‌فتیێ دێ ل 17ێ ئیلۆنێدا ب مه‌شا هه‌فتیێ ده‌ست پێبکەت. به‌شدارێن ڤی به‌شێ دێ ب جلكێن کوردی بمه‌شن. د مه‌شێدا یا ب جلكێن کوردی، دێ بیک و زاڤایه‌ک ژی جهـ بگرن. د ئێڤارا ڕۆژا ئێکه‌مین کۆنسێرتا هونه‌رمه‌ند تارا جاف و ته‌ماشەکرنا فیلمێ نورای شاهین هه‌یه. هه‌فتییا چاندا کوردی کو پێنج ڕۆژان وێ به‌رده‌وام بکەت دێ کۆنسێرتا مه‌حمه‌ت ئاتلی، ته‌ماشه‌کرنا فلمێ هونه‌ر سالیم ژی هەبیت، پێشانگه‌هـ و دانه‌ناسینا خوارنێن کوردی جهێ خۆ دگرن، پێشانگه‌ها وێنه‌یان یا جۆلن دلفۆسس یێ بەلجیکی وێ ڤەبیت پاشان کۆما گۆڤه‌ندێ و گه‌له‌ک چالاکیێن دن ژی وێ بێن لدارخستن. فۆتۆگرافه‌ر سووه‌ر، ژ به‌ر پێشانگه‌ها خۆ یا ل بروکسێلێ کەیفخۆ‌شییا خۆ ئانی زمان و وەها ژ وار را ئاخڤی:“به‌شه‌ک ژ خه‌باتێن من یێن هه‌ری گرنگ بۆ من پێشانگه‌هـ و خه‌باتێن ل ده‌رڤه‌ی وه‌لاتینە. ئه‌ز ب وێنه‌یێن خۆ دخوازم چاند، هونه‌ر و مرۆڤێ کورد و وه‌لاتێ خۆ کوردستانێ بدەم ناسین. پێشانگه‌هێن ل ده‌رڤه‌ى وەلاتی بۆ من ژی تایبەتمەندییەک خۆ یا هەی. د ده‌مێن پێشدا ئارمانجا من ئه‌وه کو ئه‌ز ل پاریس، لەندەن، به‌رلین و ڤییەنایێ ژی پێشانگه‌هان ڤه‌کەم.”
