دوپاتیێ ل بجهئینانا رێككەفتنان دكەین و بەغدا د دەمێ خوە دا مووچە و بودجەیێن هەرێمێ بهنێریت
ب سەرپەرشتییا سەرۆك بارزانی، كۆمیتەیا ناڤەندییا پارتی دیموكراتی كوردستان كۆمبوونەكا بەرفرهە ئەنجامدا و پشتی كۆمبوونێ بەیاننامەیەك بەلاڤكر و ئەڤە دەقێ وێ یە:
ب سەرپەرشتییا سەرۆك مەسعود بارزانی، كۆمیتەیا ناڤەندییا پارتییا مە، كۆمبوونەكا بەرفرهە ئەنجامدا.
كۆمبوون ب ساتەكێ وەستییان بۆ رێزگرتن ل گیانێ پاقژێ شەهیدێن كوردستانێ و سەروەرێ وان بارزانیێ نەمر و كاك ئدریسێ هەردەم ل بیر دەستپێكر، پاشی بیر و بۆچوون هاتنە لێكگوهارتن ل سەر كۆمەكا بابەتێن گرنگ، هەروەسا بڕیارێن پێدڤی هاتنە وەرگرتن بۆ ئەوان بابەتێن پێدڤی وگەنگەشە ل سەر ئەڤان تەوەرێن خواری هاتە كرن:
ئێك: تەوەرێ سیاسی و پەیوەندیێن پارتییا مە:
رەوشا دەڤەرێ ب گشتێ و ئیراقێ ب تایبەتی هاتە باسكرن، روودانێن گرنگ و كاریگەر ل سەر بوارێن جودا جودا یێن سیاسی، لەشكری، ئابووری ل دەڤەرێ، وەكو توخمەكێ گوهۆڕینێ، تێكچوونا هەڤكێشان یان ژی دروستبوونا هەڤپەیمانیێن نوو دێ ژێ پەیدا بیت، ئیراق ژی وەكو پشكەك ژ رۆژهەلاتا ناڤین ئەڤان گوهۆڕینان كاریگەرییەكا راستەوخوە ل سەر هەموو بوارێن ژیانا خەلكێ وێ یا هەی و زێدەبوونا ئالۆزیان ژی دلتەنگییەكا مەزن دروستكرییە. پارتییا مە ب باوەری ب خوەبوون، گەلەك ب هشیاری و هووربینی پێنگاڤان د هاڤێژیت بۆ پاراستنا بەرژەوەندیێن بلند و قەوارەیێ هەرێما كوردستانێ، ژ ئەڤێ روانگەهی هەموو پەیوەندیێن ناڤخوە و هەرێمایەتی و نێڤدەولەتی د خزمەتا ڤەرەڤاندنا مەترسییان و بزاڤكرن بۆ دابینكرنا تەناهیێ و دوورئێخستنا ئەنجامێن خراب یێن ئەوان ئالۆزییان ژ هەرێما كوردستانێ.
دو: تەوەرێ حوكمەتا هەرێمێ و حوكمەتا فیدرال:
كێشە و گرفتێن د ناڤبەرا حوكمەتا هەرێمێ و حوكمەتا فیدرال كو دڤیا ب گۆڕەی دستووری و رێككەفتنێن سیاسی و ئیداری هاتبانە چارەسەركرن، ژ بەری هەموویان بابەتێ مووچەیێن فەرمانبەران و بودجەیا هەرێما كوردستانێ، كو چەندین رێككەفتن ل سەر هاتنە كرن، بەلێ ژ ئالیێ حوكمەتا فیدرالییا ئیراقێ وەكو پێدڤی ناهێنە بجهئینان و ژ ئەنجامێ بەردەوامییا چارەسەرنەكرن و نەلادانا ئاستەنگان، خەلكێ كوردستانێ ب گشتی و مووچەخۆر ب تایبەتی تووشی دلتەنگیێ بوون و زیان گەهشتێ. كۆمبوون دوپاتیێ ل بجهئینانا دستووری و رێككەفتنان دكەت و هاندانا حوكمەتا فیدرالی دكەت بۆ ب خەم وەرگرتنا ئەڤی بابەتی و ئێدی ئەڤ بابەتە نەهێتە پاشئێخستن و وەكو بڕیار ل دۆر هاتیە دان مووچە و بودجەیا هەرێما كوردستانێ د دەمێ خوەدا بهێتە هنارتن.
سێ: تەوەرێ پەیوەندیێن ناڤخوەیی:
كۆمبوونێ، ئارامی وەكو چەمكەكێ پڕ رامان و پێدڤییەك ب تایبەت بۆ قۆناغا نوكە یا هەرێما كوردستانێ دزانیت، ئارامی و هەڤدوقەبوولكرن ب هەبوونا جوداهییان ژی چ ژ روویێ نەتەوەیی یان ئایینی و ئاینزایی یان سیاسی، هۆكارن بۆ ئاڤەدانكرنێ و پێشكەڤتنێ و دابینكرنا ژیانەكا خوەش و هەژی و تەباییێ دروست دكەت و پێكڤە بەر ب ئاڤەدانكرنێ پێنگاڤ دهێنە هاڤێتن، د ئەڤی سەقای دا ژی خۆڕاگری ل بەرامبەر ئاستەنگان و پیلانێن نەحەزان ب هێزتر دبیت، لەوما كو هەرێما كوردستانێ هەلبژارتن یێن ل پێش ل هەموو دەمان پێدڤیترە ل سەر بنەمایێ پاراستنا بەرژەوەندیێن بلند و دەستكەفت و مافێن گەلێ مە و پاراستنا دامودەزگەهێن شەرعی و قەوارەیێ هەرێما كوردستانێ ئێكهەلویست بین، كەرب نەهێتە دروستكرن كو نەحەز و دژبەرێن مافێن مە مفای ژێ وەربگرن و زیان بگەهیتە هەرێما كوردستانێ. نابیت جوداهیێن مە ل سەر حیسابا قەوارەیێ هەرێمێ و دەستهەلاتێن وێ یێن دستووری و ماف و رەوشا ژیارا خەلكێ هەرێمێ بشكێت، گەل و نیشتمان ل پێشتر و پیرۆزترن ژ جوداهیێن مە.
چار: تەوەرێ دەزگەهێن شەرعی یێن هەرێمێ:
ب هەستكرن ب بەرپرسیارەتییا دیرۆكی، هەروەسا ژ روانگەها ئەوێ چەندێ كو ئەڤ دەزگەهە ژ ئەنجامێ خەباتا خەلكێ كوردستانێ و بەرگری و خۆڕاگرییا پێشمەرگێن قەهرەمان و خوینا شەهیدان و پشتەڤانییا جەماوەرێ كوردستانێ یێن ب دەستڤە هاتین، هەروەسا ئەڤ دەزگەهە وەكو میكانیزمێن مانا هەرێما كوردستانێ ب ئێكپارچەیی و پشتەڤانییا پێنگاڤێن وان دكەت بۆ چارەسەكرنا كێشە و گرفتان، هەروەسا بۆ هەلبژارتنێن خولا شەشێ یا پەرلەمانێ كوردستانێ.
پێنج: تەوەرێ هەلبژارتنێن ئورگانێن پارتییا مە:
ئاماژە ب بڕیارا كۆمبوونا پێشتر یا كۆمیتەیا ناڤەندی بۆ بجهئینانا پەیڕەوێ ناڤخوەیێ پارتییا مە، هەلبژارتنێن ئۆرگانێن هەیكەلێ رێكخستنا پارتییا مە ل سنوورێ پارێزگەهێن هەولێرێ و دهۆكێ و سلێمانیێ و پشكەكا كەركووكێ و گەرمیان هاتنە ئەنجامدان، هەلبژارتنێن ئەوان ئۆرگانان ب سەركەفتی ب دووماهی هاتن، هەموو كادرێن پشكدار د ئەڤێ پڕۆسەیێدا كور و كچێن پارتی و رێبازا بارزانی نە، هەموو ئەرك و مافێن وان دێ ل بەرچاڤ بن، ژ ئالییەكێ دیڤە كۆمبوونێ دوپاتی ل پێداچوونا داخوازی و پێشنیازان كر، هەروەسا كۆمبوونێ دەستخوەشی ئاراستەی لژنەیا تایبەتمەند و كادرێن پشكدار د ئەنجامدانا ئەوێ پڕۆسەیا گرنگ كر.
شەش: تەوەرێ هەلبژارتنێن پەرلەمانێ كوردستانێ:
پشتی كو گەلەك ئاستەنگ بۆ هەلبژارتنێن خولا شەشێ یا پەرلەمانێ كوردستانێ هاتینە دروستكرن، كو د ئەنجامدان پڕۆسە روو ب روویێ گەلەك گرفت و كێشەیان بوو و بزاڤ ژی هاتە كرن پڕۆسە ب ئاراستەیەكێدا بچیت كو د مفایێ هەرێما كوردستانێ ب گشتی و پێكهاتەیان ب تایبەتی نەبیت، ل دووماهیێ ب بزاڤێن مەزن، پشكەك ژ لادان و بێ بەهركرنان هاتنە چارەسەركرن و بڕیارە ل 20/10/2024 هەلبژارتن بهێنە ئەنجامدان، كۆمبوونێ دوپاتی ل ئەنجامدانا پڕۆسەیەكا پاقژ كر و داخوازێ ژ خەلكێ كوردستانێ دكەت بۆ پڕكرنا ڤالاهییا دەستهەلاتا قانووندانانێ و چاڤدێریكرنێ و هەلبژارتنا پەرلەمانەكێ كارا كو ل ئاستێ چاڤەڕێبوون و خواستا خەلكێ كوردستانێ بیت، پشكداریێ د هەلبژارتناندا بكەن.
حەفت: گەنگەشەیا هەڤالێن پشكداربوویێن كۆمبوونێ:
هەڤالێن پشكدار د كۆمبوونێدا، بیر و بۆچوونێن خوە ل دۆر كار و ئەركێن ئەنجامدای یێن پڕۆسەیا هەلبژارتنان و پێنگاڤێن لژنەیا بلند یا هەلبژارتنان و پێرابوونێن پێدڤی یێن پڕۆسەیا هەلبژارتنان دەربڕی و پێشنیازێن باش و گونجای و ب مفا بۆ پاشەڕۆژێ هاتنە بەرچاڤكرن.
