دوپاتیێ ل رێكخستنا ناڤمالا كوردستانی دكەین
ب هەلكەفتا سالڤەگەرا 33 یا سەرهلدانا خەلكێ كوردستانێ، مەكتەبا سیاسی یا پارتی دیموكراتی كوردستان، پەیامەك بەلاڤكر و دوپاتی ل سەر رێكخستنا ناڤالا كوردستانی كر و پشتەڤانییا خوە بۆ ئەنجامدانا هەلبژارتنێن پەرلەمانێ كوردستانێ دیاركر.
د پەیاما مەكتەبا سیاسی یا پارتی دا هاتییە: ئەم ل پارتی دیموكراتی كوردستان، وەكو هەردەم و ل سەر هەمان پرنسیپ و پەیاما راست و دروست یا پارتییا مە دوپاتیێ ل سەر رێكخستنا ناڤمالا كوردستانی دكەین ب جۆرەكی ئەم هەموو ئالی ل سەر پرسێن ستراتیژیێن كوردستانی، ل داكۆكیكرن ژ مافێن رەوا و دستووریێن مە ل ئاخا مە ژ دەستكەفت و قەوارەیێ مە یێ نیشتمانی، هەڤئاراستە و ئێكگوتار بین و هەموو بزاڤێن رژد و دلسۆزانە بدەین ژ پێخەمەت چارەسەركرنا كێشەیان و ئەم هەموو ئالی بەرپرسیارانە بەرژەوەندییا گشتییا خەلكێ كوردستانێ ل بەرچاڤ وەرگرین و ئەركێ مە یێ بەراهیێ پاراستنا ئاخ و خەلكێ كوردستانێ و ئەڤی قەوارەی و دەستكەفتێن مە بیت».
هەڤدەم مەكتەبا سیاسی یا پارتی دیموكراتی كوردستان د پەیاما خوە دا ئاماژە ب ئەوێ چەندێ ژی كر» ل پێشبەری كۆمەكا ئاستەنگان و تەحەدییان داینە كو زێدەتر مە پێدڤی ب هەماهەنگیێ و ئێكدەستیێیە ل سەر ئاستێ هەرێما كوردستانێ و بەردەوامییا دانوستاندنان ل گەل بەغدا پایتەختا فیدرالی بەر ب چارەسەركرن و ئێكلاكرنا گیر و گرفتان تاكو جارەكادی كێشە و قەیران دوبارە نەبن».
مەكتەبا سیاسی یا پارتی دوپاتكر» هەر ژ ئەوێ روانگەهی ڤە رژدبوون ل سەر پاراستنا دەستهەلات و ماف و شایستەیێن دارایی یێن هەرێما كوردستانێ ب گۆڕەی قانوون و دستوورێ فیدرالی و دوپات دكەین ل سەر بنەمایێن سەرەكی بۆ ئاڤاكرنا ئیراقا نوو و ب دوماهی ئینان ب كێشەیێن هەلاویستی كو خوە ل بنەمایێن (هەڤپشكی و سازان و هەڤسەنگی) دبینن».
سەبارەت هەلبژارتنێن پەرلەمانێ كوردستانێ، مەكتەبا سیاسی یا پارتی راگەهاند» پشتەڤانییا خوە بۆ ئەنجامدانا هەلبژارتنێن پەرلەمانێ كوردستانێ ل ئەوی ژڤانێ سەرۆكێ هەرێما كوردستانێ بۆ دەستنیشانكری كو 10 خزیرانە ئەڤ سالەیە دكەین. سۆزێ ددەینە جەماوەرێ گەلێ خوە و هەموو دۆستێن گەلێ كوردستانێ كو پارتی دیموكراتی كوردستان ب جدی و راستگۆیانە كار بۆ ئەنجامدانا هەلبژارتنێن ئازاد و پاقژ دكەت».
زێدەتر دبێژیت» بۆ رایا گشتییا كوردستانی و ئیراقی و جیهانی رادگەهینین كو دێ پشكدارەكێ ب هێز بین ل سەرئێخستنا هەلبژارتنان و قەبوولكرنا ئەنجامێن وان ژ روانگەها باوەرییا مە یا ب هێز ب دیموكراسییەتێ و هەڤڕكییا دیموكراسییانە و ئاشتییانە و زڤرین بۆ دەنگ و بڕیارا خەلكی د حوكمڕانییا هەرێما كوردستانێ دا».
