دو بەرپرسێن دی یێن کورد ل کەرکووکێ ھاتنە لادان
ئه‌ڤرۆ نيوز، قائید میرۆ:
حوکمەتا عیراقی یا بەردەوامە لسەر لادانا بەرپرسێن کورد ل سنورێ پارێزگەھا کەرکووکێ و بەرپرسەکێ کوردژی دبێژیت، ژبلی کوردان ھەر بەرپرسەکێ عەرەب ژی نێزیکی کوردان بیت ژلایێ بەغدا دھێتە لادان لسەر کار و لادانا بەرپرس و رێڤەبەرێن کورد یا بەردەوامە.
عەدنان کەرکووکی، پەیڤدارێ سەرکردایەتیا پارتی ل کەرکووکێ بۆ رۆژناما ئەڤرۆ گۆت” پشتی روویدانێن 16ی ئۆکتۆبەرێ بەغدا ھەموو پۆستێن پارێزگەھا کەرکووکێ ل کوردان وەرگرتینە و ھەتا ھەر بەرپرسەکێ عەرەب نێزیکی کوردانبیت ھاتیە لادان ، سەرەرای ڤێ چەندێ بەری نوکە پۆستێ پارێزگاری و پتریا پۆستێن دی یێن کەرکووکێ ددەستێ کورداندابوون، بەلێ نوکە ھەموو ھاتینە لادان و پیلان ھەیە چەندین گۆھڕینێن دی بھێنەکرن بۆ لادانا رێڤەبەرێن کورد ل کەرکووکێ.
كه‌ركووكى دیارکر “پشتی حەفتیا بۆری حوکمەتا عیراقی عەمید خەتاب عومەر رێڤەبەرێ کورد یێ پۆلیسێن پارێزگەھا کەرکووکێ ل سەر کار لادای، رێڤەبەرێ پەروەردا کەرکووکێ ژی کو عەرەبە ب تۆمەتا نێزیکبوون ژ کودان ھاتیە لادان، ھەروەسا دوھی رێڤەبەرێن پۆلیسێن بەڕەڤانیا باژێڕی ژی ل سەر کارێ وی لادایە و کەسەکێ عەرەب ب ناڤێ عەقید محەمەد جبوری ل جھێ ئەڤی بەرپرسێ کورد ھاتیە دانان.