دو جۆرە باج دێ ھەرێما کوردستانێ ڤەگرن
ئەڤرۆ نيوز:
ئەندامەکێ لژنا دارایی و ئابووری ل جڤاتا نوونەرێن عیراقێ ئاشکرا کر کو د پرۆژە قانوونا بودجا گشتی یا عیراقێ دا بۆ سالا 2016 باج ل سەر چەندین کەلوپەلان ھاتیە زێدەکرن، لێ ب تنێ دو جۆرە باج ھەرێما کوردستانێ ڤەدگرن، ئێک ژ وان ژی زێدەبوونا بھایێ پلێتێن فرۆکانە.
سەرحان ئەحمەد سلێڤانەی، ئەندامێ لژنا دارایی و ئابووری ل جڤاتا نوونەرێن عیراقێ خویا کر، د پرۆژە قانوونا بودجا گشتی یا عیراقێ دا بۆ سالا 2016 باج ل سەر چەندین کەلوپەلان ھاتیە دانان و بۆ مالپەرێ فەرمیێ پارتی دیموکراتی کوردستان گۆت: “ب تنێ دو جۆرە باج دێ ھەرێما کوردستانێ ڤەگرن، ئەو ژی زێدەبوونا بھایێ پلێتێن فرۆکان و داھاتێ گۆمرکانە، پێدڤیە 50% داھاتێ گۆمرکان بۆ وێ پارێزگەھێ بیت یا ئەو خالا گۆمرکی دکەڤیتە سنوورێ وێ و ئەوێ دی بۆ حوکمەتێ ب ڤەگەریت”.
ناڤھاتی ئاماژە ب وێ چەندێ ژی کر، بھایێ پلێتێن فرۆکان، بۆ ھەر پلێتەکێ بۆ وەلاتان 25 ھزار دینار دێ ل سەر ھێنە زێدەکرن و گۆت: “ئەڤە ژی دێ ھەرێما کوردستانێ ڤەگریت، چونکو فرۆکەخانێن ھەرێما کوردستانێ ژی ھەر سەر ب بەغدا ڤەنە و ھەموویان ئێک سیستەم یێ ھەی”.
