دو قوتابيێن زانكۆيا دهۆك ديار نينن و گۆمان يا هه‌ى گه‌هشتبنه داعش
ئەڤرۆ، تایبەت:
ھاریکارێ راگرێ کۆلیژا کارگێری و ئابووری ل زانکۆیا دھۆک دیار کر کو ژ ئێکشەمبیا بۆری وەرە ھەردو قوتابیێن وان دیار فائێق محەمەد ژ پشکا دارایی بانک قوناغا چارێ و عومەر عەبدولجەبار حەسەن پشکا کارگێری قۆناغا سیێ کۆلیژا کارگێری و ئابووری د بێ سەروشوونن.
محەمەد جەمیل ئاشکرا ژی کر ل دەمژمێر حەفتی سپێدێ یێن ژ مال دەرکەفتین کو خەلکێ قەزا بەردەرەشن و یێن گۆتینە خێزانێن خوە دێ چینە دەوامێ و ھەتا نوکە د بێ سەروشوونن و گۆت: “دایک و بابێن وان سەرەدانا مە یا کری و ئەو ژی چو ژێ نزانن و مە ئالیێن پەیوەندیدار ل دۆر بابەتی یێن ئاگەھدار کرین”.
محەمەد جەمیل خویا کر کو ھەڤالێن وان یێن پشکا ناڤخۆیی ژی چو ژێ نزانن و گۆت: “رەنگە تووشی روودانەکێ ببن یان بەر ب جھەکی چوو بن”.
ھندەک ژێدەر د ناڤ کۆلیژا ناڤھاتی دا دیار دکەن کو گومان وێ چەندێ ھەیە ئەڤ ھەردو قوتابیە گەھشتبنە ناڤ ریزێن داعش.
