دو ھزار فەرمانبەر دێ ھێنە دامەزراندن
ئه‌ڤرۆ نيوز:
ھژمارەکا دەرچوویێن کۆلیژێن پزیشکی دوھی رۆژا 12ى شوباتا 2017ێ خوەنیشاندانەک ل ھەمبەر وەزارەتا ساخلەمیێ یا حوکمەتا ھەرێما کوردستانێ ئەنجامدا و تێدا داخواز کر کو حوکمەتا ھەرێما کوردستانێ لەزێ ل دامەزراندنا دەرچوویێن پزیشکی و نۆشدارێن گەنج بکەت، وەزارەتا ساخلەمیا ھەرێمێ ژی سۆز دا خوەنیشاندەران پێداچوونێ د رێنمایان دا بکەن بۆ بجھئینانا داخوازیێن وان.
دەرچوویێن کۆلیژێن پزیشکی ل باژێڕێ ھەولێرێ د خوەنیشاندانێ دا بۆ ھەمبەر ئاڤاھیێ وەزارەتا ساخلەمیا حوکمەتا ھەرێما کوردستانێ ئاشکرا کر کو ئەڤە چەندین جارە وەزارەتا ساخلەمیێ یا حوکمەتا ھەرێما کوردستانێ سۆزێن دامەزراندنێ دەتە وانا، بەلێ چو سۆز ناھێنە بجھئینان و گۆتن: “پێدڤیە مۆلەت
ب دەرچوویێن پزیشکی بۆ ڤەکرنا جھێن تایبەت یێن نۆشداری بھێتەدان و رێگری لێ نەھێتەکرن، چونکی ھژمارەکا بەرچاڤ یا ئەڤان دەرچوویان بێکار ماینە و حوکمەتا ھەرێما کوردستانێ ژ بلی ڤێ چەندێ دامەزراندن ڕاگرتیە، رێ یێ نادەت کارێن ئەھلی بکەن و جھێن تایبەت بۆ خوە ڤەکەن”.
د دەمێ گەھشتنا خوەنیشاندەران دا دکتۆر خالس قادر پەیڤدارێ وەزارەتا ساخلەمیێ دیار کر کو وەزارەتێ چەندین جاران داخوازا دامەزراندنا وان ژ سەرۆکاتیا جڤاتا وەزیران کریە، بەلێ ژ بەر قەیرانا دارایی دامەزراندن ھاتیە ڕاگرتن و گۆت: “سەرەرایی ڤێ چەندێ حوکمەتێ سۆزدایە دو ھزار فەرمانبەر بۆ وەزارەتا ساخلەمیێ ب دامەزرینیت و ناڤێن وان ژی ھاتینە بلندکرن بۆ جڤاتا وەزیران و پشکا شێری ژ ڤان فەرمانبەران دێ ب بەر دەرچوویێن پزیشکی کەڤیت و دێ ھەموو بزاڤان دگەل سەندیکایێن نۆشداری و دەرمانسازی کەین پێداچوونێ د رێنمایێن ڤەکرنا جھێن تایبەت دا بکەن داکو مۆلەت ب وان دەرچوویان بھێتەدان”.
