دو ھەسارە نێزیکێ عەردی دبن

ئەڤرۆ نیوز، نەوزاد ھلوری:

دھێتە پێشبینیکرن کو ئەڤ شەڤە دوو ھەسارە ل عەردی نێزیک بن، بگورەی ئاژانسا فەلەکناسی (ناسا) یا ئەمریکی لەزاتیا وان دگەھیتە 20 ھزار میلان د دەمژمێرەکێ دا.

ھەسارا ئێکێ ھاتیە بناڤکرن ب 2019 DC و دێ ب دوراتیا 4.18 ملیون کم ل عەردی نێزیک بیت، کو دبیتە 10 جاران ھندی دناڤبەرا عەردی و ھەیڤێ دا، ب گورەی پیڤەرێن گەردونی ئەڤ یەک دوراتیەکا کێمە.
لەزاتیا وێ دگەھیتە 9.22کم د چرکەیەکێ دا و 33 ھزار و 152 کم ددەمژمێرەکێ دا و تیرا وێ 30.5م کو دشیاندایە تیرا وێ ب قەبارێ ئاڤاھیەکێ 11 نھومی بھێتە ھەمبەرکرن.

ھەسارا دویێ ھاتیە بناڤکرن ب 2019 DL1 و ئێکسەر دوڤ وێدا دھێت، ھەمان قەبارێ ھەسارا ئێکێ یە، ب دوراتیا 3.7 ملیون کم ل عەردی نێزیکە.

لەزاتیا وێ دگەھیتە 4.42کم د چرکەکێ دا، ئانکو پیچەک کێمتر ژ 16 ھزار کم د دەمژمێرەکێ دا یان ژی زێدەتر ژ 10 جاران ھندی لەزاتیا گولەیی یە.

وەکو ئاژانسا ناڤبری بەلاڤکری، ئەڤ بەرێ ئەسمانی چ ھەرەشە بو سەر ژیانا عەردی نینە، ناھێتە پێشبینیکرن کو ب سەدان سالێن دی چ ھەسارەک بەر عەردی بکەڤن، ئەگەر روو بدەن ژی قەبارێ وان وەسا مەزن نینە کو ژیانێ لسەر عەردی نەھێلن.

ناسا لدور دوماھی ھاتنا دنیایێ ب کارەساتەکا بڤی رەنگی پشتراستیێ ددەت رونشتڤانێن دنیایێ و دوپات ژی کر ژ ئەگەرێ ھەر پێشبینیەکێ ب کەفتنا ھەر ھەسارە و تەنەکێ دگەردونی دا ئەو دێ ھەموو دنیایێ ئاگەھدار کەن.

کۆمێنتا تە