ديجله وفورات يێن دمه‌ترسيێ دا
ئه‌ڤرۆنيۆز:
ئه‌ندامه‌كێ لژنا وزێ ل جڤاتا نوونه‌رين عيراقێ راگه‌هاند، چو رێككه‌فتن ل دۆر ئاڤێ دناڤبه‌را عيراقێ وتوركيا نينن و چاره‌سه‌ركرنا كێشا ئاڤێ پێدڤى ب مايتێكرنا نێڤده‌وله‌تى يه.
عه‌زيز ئه‌لعگێلى ئه‌ندامێ لژنا وزێ ل جڤاتا نوونه‌رين عيراقێ دداخۆيانيه‌كا رۆژنامه‌ڤانى دا گۆت، ل مه‌ها ئادارا 2018، دێ توركيا ده‌ست ب پرۆسا عومباركرنا ئاڤێ دسكرێ ئه‌ليسۆ دا كه‌ت وئه‌ڤ چه‌نده ژى دێ كارتێكرنه‌كا گه‌له‌ك مه‌زن ل هه‌درو رووبارێن ديجله وفورات كه‌ت ورێژا دهێته دناڤ عيراقێ دا دێ كێم بيت وئه‌ڤه ژى ئاريشه‌كا گه‌له‌ك مه‌زن ومه‌ترسيداره.
عگێلى زێده‌تر بۆ (بغداد اليوم) گۆت ، چو رێككه‌فتن دناڤبه‌را به‌غدا وئه‌نقه‌ره ل دۆر ڤێ چه‌ندێ نينن وپێدڤيه سه‌رۆكاتيا جڤاتا وه‌زيرێن عيراقێ ووه‌زاره‌تا ده‌رڤه بێ ده‌نگ نه‌مينن وبه‌هرا عيراقێ ژ ئاڤا هه‌ردوو رووباران ژ توركيا گره‌نتى بكه‌ن.
دياركر ژى، پێدڤيه مايتێكرنه‌كا نێڤده‌وله‌تى دڤێ كێشا مه‌ترسيداردا بهێته كرن بۆ دابينكرنا به‌هرا عيراقێ يا ئاڤێ، ژبه‌ركو ئه‌ڤ چه‌نده پرسه‌كا مه‌ترسيدار وگرێداى ژيانا مرۆڤايه.
