ديندار زێبارى به‌حس ل ده‌ستدرێژيێن سكسى يێن ناڤ كه‌مپا دۆميز ل دهۆك دكه‌ت
ئه‌ڤرۆ نيوز:
پشتى هاتنا نێزيكى دو مليۆن ئاواره و په‌نابه‌ر هاتينه سنورێن هه‌رێما كوردستانێ گه‌له‌ك ژ رێكخراوێن بيانى و ناڤخۆى يێن هه‌رێما كوردستانێ به‌حس ل بازرگانيكرنێ ب مرۆڤان دكه‌ن ب ره‌نگه‌كێ جودا و هنده‌ك ژ داموده‌زگه‌هێن حوكمه‌تا هه‌رێما كوردستانێ ب وێ چه‌ندێ تۆمه‌تبار دكه‌ن كو ده‌ست د وێ چه‌ندێ دا هه‌يه و داخوازا نه‌هێلانا ڤان ره‌نگه پێشێلكاريان دكه‌ن.
د. ديندار زێبارى سه‌رۆكێ لژنا هه‌لسه‌نگاندن و به‌رسڤدانا راپۆرتێن نێڤده‌وله‌تى راگه‌هاند: حوكمه‌تا هه‌رێما كوردستانێ كۆمه‌كا رێ و قانوونان بۆ رێگرتن ل بازرگانيكرنێ ب مرۆڤان گرتينه به‌ر و چه‌ندين رێنمايێن تايبه‌ت به‌لاڤكرينه، هه‌ر ديسان به‌رده‌وام بزاڤ كريه ژيانا تاكى به‌ر ب باشتريێ ببه‌ت و زه‌مينه‌يه‌كا پێكڤه‌ژيانێ بۆ به‌رهه‌ڤ بكه‌ت دا كو خه‌لك ل هه‌رێما كوردستانێ ب ئاشتيانه بژيت، به‌لێ ژ به‌ر ره‌وشا ئابوورى و كاودانێن نوكه هه‌تا راده‌كى ئاسته‌نگ بۆ حوكمه‌تێ د روو ب رووبوونا ڤان كاران دا په‌يدا بووينه.
زێده‌تر گۆت: “ب فه‌رمانا وه‌زاره‌تا ناڤخۆ يا ژماره (8322) ل 16ى گۆلانا 2016ێ لژنا بلندا به‌رسينگگرتنا بازرگانيكرنێ ب مرڤان ل هه‌رێما كوردستانێ هاتيه پێكئينان كو ژ نوونه‌رێ حوكمه‌تا هه‌رێمێ ل وه‌زاره‌تا ناڤخۆ و كار و كاروبارێن جڤاكى و فه‌رمانگه‌ها په‌يوه‌نديێن ژ ده‌رڤه كو ئه‌ركێ وێ دووڤچوون بوويه بۆ ئه‌وان كه‌يسان يێ ل هنده‌ك ژ راپۆرتێن نێڤده‌وله‌تى سه‌باره‌ت بازرگانيكرن ب مرۆڤان هاتينه به‌حسكرن.
دا زانين ژى كو هه‌رديسان بۆ زێده‌تر دووڤچوون د ڤان كه‌يسان دا لژنه‌كا دى هاتيه پێكئينان ب فه‌رمانا وه‌زيرێ ناڤخۆ يا ژماره (9386) ل 31ى گۆلانا 2016ێ چه‌ند لژنێن لاوه‌كى بۆ ڤه‌كولينێ ل پارێزگه‌هێن هه‌رێمێ ب پشكداريا ئه‌ندامێن ئاسايش و داموده‌زگه‌هێن په‌يوه‌نديدار هاتينه پێكئينان، “ژ لايه‌كێ دى ڤه فه‌رمانا جه‌نابێ وه‌زيرێ ناڤخۆ ژماره (573) ل 19ى تيرمه‌ها 2016ێ لژنه‌كا لاوه‌كى يا دى بۆ ڤه‌كولينێ د ئه‌نجامدانا ده‌ستدرێژيێ بۆ سه‌ر ژنێن په‌نابه‌رێن رۆژئاڤا ل تايبه‌ت كه‌مپا دۆميز ل دهۆكێ هاتيه پێكئينان”.
سه‌رۆكێ لژنا هه‌لسه‌نگاندن و به‌رسڤدانا راپۆرتێن نێڤده‌وله‌تى ئاماژه ب وێ چه‌ندێ ژى دا كو پشتى لژنه ده‌ست ب كار بووين كۆمه‌كا رێنمايان ژ ده‌رئه‌نجامێ كارێن لژنا بلندا به‌رسينگگرتنا بازرگانيكرنێ ب مرۆڤان په‌سه‌ندكرن و ب گۆره‌ى ئه‌وان رێنمايان ژماره‌كا كۆمپانيێن تايبه‌ت كو به‌رپرسن ژ پێدانا مۆله‌تا مانا كرێكارێن بيانى دڤێت كارئاسانى بۆ بهێته كرن هه‌ر ديسا ئه‌و كۆمپانيێن كرێكارێن بيانى دئيننه هه‌رێمێ به‌رپرسن ژ ڤه‌گه‌راندنا كرێكاران بۆ وه‌لاتێن وان به‌رى ب دووماهى هاتنا ڤيزايێن وان و هه‌كه هات و نه‌هاته هنارتن دێ ب كۆژمێ پێنج مليۆن دۆلاران هێنه سزا دان و روو ب روويێ سزايێن قانوونى بن.
ده‌رباره‌ى كارێ لژنێن لاوه‌كى ژى ب تايبه‌تى ئه‌وێن ل پارێزگه‌ها دهۆك هاتينه پێكئنيان، زێبارى گۆت: “پشتى ڤه‌كولينێن هوور لژنه گه‌هشتنه چه‌ند راستيه‌كان ده‌رباره‌ى ئه‌و كه‌يسێن هاتينه به‌حسكرن ژ وان ژى ژماره‌ك ژ وان كه‌سێن ژێر ژيێ قانوونى ب نهێنى داينه شوو و ب ره‌نگه‌كێ نه‌يێ قانوونى و بێ ره‌زامه‌نديا دادوه‌رى يان دادگه‌هێ ئه‌ڤ كاره هاتيه كرن، هه‌ر كه‌سێ ده‌ست د شووكرنا زارۆيان دا هه‌بيت دێ هێته ده‌سته‌سه‌ركرن و ب گۆره‌ى قانوونێ سه‌ره‌ده‌رى ل گه‌ل هێته كرن، ديسا ده‌رباره‌ى هه‌موو ئه‌و كه‌يسێن به‌حس ل ده‌ستدرێژيێ هاتينه كرن بۆ سه‌ر ژنان ژ لايێ خۆجهێن كه‌مپێ ڤه نه‌هاتينه پشتراستكرن”.
