دڤێت رەفتارا نە دادپەروەرانەیا ل گەل فەرمانبەرێن هەرێما كوردستانێ دهێتە كرن ب دووماهی بهێت

ب سەرپەرشتییا سەرۆك مەسعود بارزانی، دوهی دوشەمبی 2/6/2025، كۆمیتەیا ناڤەندییا پارتی دیموكراتی كوردستان، كۆمبوونەكا خوە یا بەرفرەه ئەنجامدا و تێدا چەندین تەوەر باسكرن ژوان پەیوەندی ل گەل ئیراقێ و پرسا نەهنارتنا مووچەیێن فەرمانبەرێن هەرێمێ و بزاڤێن پێكئینانا كابینەیا نوو یا حوكمەتا هەرێمێ.

دەقێ بەیاننامەیا كۆمبوونا كۆمیتەیا ناڤەندییا پارتی دیموكراتی كوردستان

ب سەرپەرشتییا جەنابێ (سەرۆك مەسعود بارزانی)، كۆمیتەیا ناڤەندییا پارتا مە، ب بەرهەڤبوونا هەڤالێن كۆمیتەیا ناڤەندی و بەرپرسێن لقان، ل دوشەمبی 2/6/2025 كۆمبوونا خوە یا بەرفرەه ئەنجامدا.
كۆمبوونێ ب ساتەك راوەستان بۆ رێزگرتنێ ل گیانێ پاقژێ شەهیدێن كوردستان، سەروەرێ وان بارزانیێ نەمر و كاك ئدریسێ هەردەم ساخ، پاشی چەند پرسێن گرنگ هاتنە شرۆڤەكرن و گەنگەشە ل دۆر هاتە كرن.
تەوەرێ ئێكێ/ پەیوەندیێن مە ل گەل حوكمەتا فیدرال، پارتا مە ل قۆناغا بەرهنگاربوون و ژناڤچوونا رژێمێ و پاشی ژی ل ئاڤەدانكرنا ئیراقەكا نوو كو تێدا هەموو هەڤوەلاتی هەست ب ئارامیی و بكەن و ب گۆڕەی دستووری بگەهنە ماف و ئازادیێن خوە، ئیراقەك كو بێی جوداهییا نەتەوەیی و ئایینی و مەزهەبی بۆ هەموویان بیت، رۆلێ كاریگەر هەبوو، سەركردایەتییا سیاسییا كوردستانێ ب بڕیارا پەرلەمانێ كوردستانێ پشكداری د دارمەزراندنا ئیراقەكا نوو دا كر ل سەر بنەمایێ هەڤپشكیێ و سازانێ و ل هەڤهاتنێ (شراكە، توافق، توازن) و ب رێڤەبرنا ئیراقێ ژ ئالیێ هەموو پێكهاتەیێن وێڤە ب گۆڕەی دستوورێ بەردەوام یێ ئیراقا فیدرال و دابینكرنا ژیانەكا هەژی بۆ هەموو خەلكێ ئیراقێ كو ببیتە جهێ قەرەبووكرنا وان هەموو نەهامەتی و وێرانیێن ب سەر ئیراقێ ب گشتی و كوردستانێ ب تایبەتی هاتین. مخابن پشتی دەربازبوونا چەند سالان ل سەر ژناڤچوونا رژێمێ، پشكەك ژ دەستهەلاتدارێن بەغدایێ ب مەژیێ دوور ژ مەژیێ فیدرالی و ب ئاراستەیێ ڤەگەراندنا دەولەتا مەركەزی و پشتكرن ل دستووری و رێككەفتنێن كو د ناڤبەرا ئالیێن سیاسی دا هاتینە ئەنجامدان بۆ پێكئینانا كابینەیا حوكمەتێ و فشار ئێخستنێ ل سەر هەرێمێ ب هەموو شێوازەكی و بكارئینانا كارتا مووچەی و بودجەیا هەرێما كوردستانێ پێنگاڤان د هاڤێژن، كۆمبوونێ پەسەند و پشتەڤانییا هەلوەستێ مەكتەبا سیاسییا پارتا مە كر ل دۆر مووچەیێن مووچەخۆرێن كوردستانێ، هەروەسا هەلوەستێ حزبێن كوردستانی ل كۆمبوونا هەڤپشك ل رێكەفتی 31 گولانا 2025 بلند هەلسەنگاند و پشتی وێ ئاماژەیا ئەرێنی كو ژ ئالیێ حوكمەتا فیدرالی و دەزگەهێ دادوەری هەی بۆ چارەسەركرنا گرفتێ ئەم ژی داكۆكیێ ل چارەسەركرنا كێشەیان دكەین و دووماهی ئینانێ ب ڤی شێوەیێ رەفتارا نەدادپەروەرانە كو ل گەل رەوشا ژیارا فەرمانبەر و مووچەخۆرێن كوردستانێ دهێتە كرن.
تەوەرێ دویێ/ پەیوەندیێن مە ل گەل هێز و ئالیێن سیاسی یێن كوردستانی، پارتا مە باوەرییا تمام ب فرەحزبیێ و دگەلدا ژی ب كارێ هەڤپشك و بەرپرسیارەتییا هەڤپشك هەیە، ژ ڤی روانگەهیڤە مە بەردەوام بزاڤا رێكخستنا ناڤمالا كوردستانی هەبوویە و مە بزاڤا جدی ژی كر بۆ دروستكرنا هەڤپەیمانییەكا كوردستانی بۆ پشكداریكرنا د هەلبژارتنێن داهاتی یێن خولا شەشێ یا جڤاتا نوونەرێن ئیراقێ بۆ وێ چەندێ ل بەغدایێ وەكو پێكهاتەیێ كوردی مە رۆلەكێ كاریگەر هەبیت، نەك وەكو ئەحزاب، بەلێ مخابن پێشوازی ل وێ بزاڤا مە نەهاتە كرن و یا بێ ئەنجام بوو. دووماهی بزاڤا مە ژی بۆ پێكڤە كاركرنێ و دروستكرنا ئێك بۆچوون بەرامبەر كێشە و ئاستەنگان ئەوبوو كو مە داخواز ژ هەموو پارت ‌وئالیێن كوردستانی كر و مە مێهڤانكرن بۆ كۆمبوونەكا هەڤپشك كو ب سوپاسیڤە بەهرا هەرە مەزن یا حزب و ئالییان بەرهەڤی كۆمبوونێ و دانوستاندنان بوون هەڤدەم چەند ئالییەكا ژی دەستپێشخەرییا مە قەبوول نەكركو ئارمانج ژێ راوێژ و لێكگۆهارتنا بیر و بۆچوونان بوو ل دۆر بڕیارا نە قانوونی یا وەزارەتا داراییا حوكمەتا فیدرال سەبارەت ماف و شایستەیێن دارایی یێن مووچەخۆران ب تایبەتی و خەلكێ هەرێما كوردستانێ ب گشتی، جهێ ئاماژە پێكرنێیە كۆمبوونا ناڤبری كۆمبوونەكا باش و سەركەفتی بوو.
تەوەرێ سیێ/ سەرەدان و كۆمبوونێن بەرێز سەرۆكێ حوكمەتا هەرێما كوردستانێ، پشتی دانوستاندن و رۆهنكرنا ناڤەرۆكا سەرەدانا وی بۆ ئەمریكا، كۆمبوونێن وی ل گەل كەسایەتی و دەزگەهێن وی وەلاتی ب كارەكێ باش هاتە زانین بۆ زێدەتر ب هێزكرنا پەیوەندیێ د ناڤبەرا هەرێما كوردستانێ و ئەمریكا دا، هەروەسا رێككەفتنێن ل سەر زەڤیێن غازێ و پەترۆلێ كو د چارچۆڤەیێ مافێن دستووری و قانوونی یێن هەرێمێ دانە، ب مفایێ ڤەژاندنا ئابۆرییا هەرێما كوردستانێ و ئیراقێ هاتە زانین.
تەوەرێ چارێ/ پرۆسەیا پێكئینانا كابینەیا دەهێ یا حوكمەتا هەرێما كوردستانێ: لژنەیا دانوستاندنێن پارتا مە پێزانین و رۆهنكرنێن پێدڤی ل دۆر پێنگاڤێن وێ پرۆسەیێ پێشكێشی كۆمبوونێ كر، بەردەوامییا پێنگاڤێن لژنەیا ناڤبری ب مەبەستا پێكئینانا كابینەیا دەهێ ب زووترین دەم ب پێدڤی هاتە زانین.
تەوەری پێنجێ/ پرۆسەیا هەلبژارنێن خولا شەشێ یا جڤاتا نوونەرێن ئیراقێ، لژنەیا بلند یا سەرپەرشتا پرۆسەیا هەلبژارتنان هەموو پێنگاڤ و بەرهەڤیێن كو هاتینە كرن و پلان و بەرنامەیێ داهاتی یێ لژنێ و ئۆرگانێن پارتا ە سەبارەت ڤێ پرۆسەیێ بەرچاڤكر، كۆمبوونێ پلان و بزاڤێن لژنەیا ناڤبری ب گۆڕەی وی خشتەیێ دەمی كو هاتیە دیاركرن ب پەسەند زانی.

كۆمیتەیا ناڤەندی
پارتی دیموكراتی كوردستان
2/6/2025

کۆمێنتا تە