دڤێت پرسـا کـوردی ل پەرلەمـانێ تورکیا بهێتە چـارەسەرکـرن
سەرۆکێ گشتی یێ پارتا کۆماریا گەل پشتی هەڤدیتنا ل گەل سەلاحەدین دەمیرتاشی دیار کر، دڤێت پرسا کوردی ل پەرلەمانێ تورکیا بهێتە چارەسەرکرن و وەکو پارتا کۆماریا گەل ئەو کار دکەن پرسا کوردی و هەموو پرسێن دی یێن تورکیا بهێنە چارەسەرکرن.
ئۆزگور ئۆزه‌ل سه‌رۆکێ گشتی یێ پارتا کۆماریا گه‌ل سه‌ره‌دانا سه‌لاحەدین ده‌میرتاش هه‌ڤسه‌رۆکێ به‌رێ یێ هەدەپێ ل زیندانێ کر و پشتی هه‌ڤدیتنێ بۆ رۆژنامه‌ڤانان راگه‌هاند کو وی ل گه‌ل ده‌میرتاشی ره‌وشا گشتی یا تورکیا گه‌نگه‌شه کرینه و گۆت: (گه‌له‌ک ئاشکرایە کو سه‌لاحەدین ده‌میرتاش و هه‌ڤالێن وی ب بریاره‌کا سیاسی د زیندانێ دانه و پێدڤیە دەمیرتاش هەر زوو بهێتە ئازاد کرن، د هەڤدیتنێ دا مە بەحسێ پرسێن نها یێن تورکیا کر، ب تایبەتی ژی پرسا کوردی و نێرینا مە سەبارەت ب چارەسەرکرنا پرسا کوردی گەلەک نێزیک هەڤدویە و دەمیرتاش ژی وەسا دبینیت کو دڤێت پرسا کوردی ل پەرلەمانێ تورکیا بهێتە چارەسەرکرن).
سه‌رۆکێ گشتی یێ پارتا کۆماریا گەل ئەو یەک ژی دیار کر وەکو پارتا کۆماری ئەو دێ سەرەدانا باژێرێن ئامه‌د، وان، باتمان، شه‌رنه‌خ و مێردینێ کەن و دخوازن ره‌وشا وه‌لاتیێن هه‌رێمێ ژ نێزیکڤه ببینن و گۆت: (مخابن نها رەوشا تورکیا گەلەک خرابە، ئاستێ دیموکراسیێ و ئازادیا راگەهاندنێ ل تورکیا وەکو بەرێ نەمایە، رەوش خرابە و ژ بەر ڤێ یەکێ ژی وان دڤێت نێرینا کوردان و هەموو وەلاتیێن تورکیا ل دۆر چارەسەرکرنا پرسێن نها یێن تورکیا بزانن، وەکو پارتا کۆماری ئەو دێ ب رەنگەکێ جدی کار بۆ چارەسەرکرنا هەموو پرسێن نها یێن تورکیا کەن، ب تایبەتی ژی پرسا کوردی و قەیرانا ئابووری کو کاریگەریا خوە یا خراب ل سەر رەوشا نها یا تورکیا کرینە و مخابن هەتا نها ژی دەستهەلاتێ چو پرۆژە بۆ چارەسەرکرنا ڤان پرسێن گرنگ نینە).
سەرۆکێ گشتی یێ پارتا کۆماریا گەل ئەو یەک ژی دیار کر، بەری سەد سالان کوردان و تورکان پێکڤە ل دژی داگیرکەران شەڕ کرن و شیان وەلاتێ خوە ئازاد بکەن، نها ژی دڤێت کورد و تورک پێکڤە تورکیا بەر ب قۆناغەکا نوو ڤە ببەن، دڤێت پرسێن هەی بهێنە چارەسەرکرن و گۆت: (مە بەری نها ژی دیار کریە کو دڤێت پرسا کوردی ل پەرلەمانێ تورکیا بهێتە چارەسەرکرن، ئەم جارێ ب تەمامی نزانین کا نیەتەکا ئەردۆغانی بۆ چارەسەرکرنا پرسا کوردی هەیە یان نە؟ لێ وەکو پارتا کۆماری ئەم بەرهەڤین پرسا کوردی ل پەرلەمانێ تورکیا چارەسەر کەین، چونکی تورکیا نەچارە پرسا کوردی چارەسەر بکەت، ژ بەر ڤێ یەکێ ژی ئەم هیڤیدارین ئاکپارتی ژی پرۆژێ خوە بۆ چارەسەرکرنا پرسا کوردی بۆ رایا گشتی ئاشکرا بکەت، چونکی هەتا نها دیار نینە کا ئاکپارتیێ دڤێت چاوا پرسا کوردی چارەسەر بکەت).
