دکتۆر موسه‌نا ئەمین : هه‌ر كه‌سێ باوەری ب سه‌ربه‌خۆیا كوردستانێ هەبیت،وی باوەری ب ئێكپارچه‌یا ئاخا عێراقێ نینه
ئەڤرۆ نیوز ، زنار تۆڤی:
دکتۆر موسه‌نا ئه‌مین ئه‌ندامێ سه‌ركردایه‌تیا ئێكگرتوویا ئیسلامیا كوردستانی و سه‌رۆكێ فراكسیۆنا ئێکگرتوو ل پەرلەمانێ عێراقێ د دیدارەکێدا بۆ ئەڤرۆ نیوز دا دیارکرن:کو سووند خوارنا وی یا دستوری بۆ ئه‌ندامەتیا په‌رله‌مانێ عێراقێ مانا باوەریێ نینە ب ئێکپارچه‌یا ئاخا عێراقێ،ئەز سووندێ بۆ هندێ ناخۆم،کو ئێک پارچه‌یا ئاخا عێراقێ ژ عێراقیان بپارێزم، به‌لكو سووندێ بۆ هندێ دخۆم،کو ئاخا عێراقێ ژ ده‌رڤەی عێراقێ بپارێزم،دیسا ل چو جهێن سووندا دستوری دا بەحسێ ئێکپارچەیا ئاخا عێراقێ نەهاتیە کرن.
د.موسه‌نا ئه‌مین زێدەتر گوتیە،ریفراندۆم تاوان نه‌بوو،هەتا بێژین بۆچی هاتە ئه‌نجامدان یان ژی نه،هەکە مە ژ چونە ژی ئه‌نجام دابیت، كێشه نینە،لێ كێشه ئه‌وه،کو ده‌ستهە‌لاتدارێن عێراقێ كریە تاوانەک بۆ گه‌لێ كورد.
موسه‌نای جه‌خت ل هندێ كریه،کو وی باوەری ب ئێک پارچه‌یا ئاخا عیراقێ نینه و گوت هه‌ر كه‌سێ باوەری ب سه‌ربه‌خۆیا كوردستانێ هەبیت،وی باوەری ب ئێكپارچه‌یا عێراقێ نینه،ئه‌ڤه گوتنا من نینه و گوتنا هه‌موو حیزبانە، به‌لێ ره‌نگه ئەز وێرەکتر بم،کو ڤێ گوتنێ ب راشكاوانه دبێژم،ئه‌ڤە باوەریا سیاسیه و هیچ بەرۆڤاژیەک نینه،ل توركیا كورد سووندێ ب مەزنیا ملله‌تی دخون و باوەری ژی ب ده‌وله‌تێ و سه‌ربه‌خۆیا كوردان هه‌یه.
ناڤهاتی گوت ژی :لدووڤ ماددێ (٥٠) ژ دستورێ هه‌میشه‌یی یێ عێراقێ،دەمێ كاندیدەک رێژه‌یا ده‌نگێن پێدڤی دئینیت بۆ ئه‌ندامەتیا په‌رله‌مانێ عێراقێ،دڤێت سووندا ده‌ستوری ب ڤی شێوه‌ی بخوت سووند ب خودایێ مه‌زن،ئه‌رك و به‌رپرسیارەتیا قانوونی ب دلسوزی جێ به‌جێ بكه‌م و پارێزگاریێ ل سه‌روه‌ریا عێراقێ بكه‌م و به‌رژه‌وه‌ندیا گه‌لێ وێ ل به‌رچاڤ بگرم و شه‌ونخونیێ بكه‌م بۆ سلامه‌تیا زه‌ڤی و ئەسمان و ئاڤ و سامان و رژێما دیموكراتی و فیدرالیا وێ و كار بكه‌م بۆ پارێزگاری كرنێ ل ئازادیا گشتی و تایبه‌تی و سه‌ربه‌خۆیا دادگەهێ و پابه‌ندبوون ب جێ به‌جێكرنا قانوونان ب ئه‌مانه‌ت و بێلایه‌نی،خودێ شاهده ل سه‌ر ئه‌وا ئەز دبێژم.
د.موسه‌نا دبێژیت ژی، سه‌روه‌ریا ئاخا عێراقێ،ئانکو نە ئێكپارچه‌یا ئاخا عێراقێ یه،ل چو جهان ئه‌و سوونده بەحسێ ئێکپارچه‌یا ئاخا عێراقێ ناكەت،ئەز سووند دخۆم کو ئاخا عێراقێ بپارێزم،ژ دوژمنێن ده‌رڤە نه‌كو ژ گه‌لێن عیراقێ بخۆ،کو مالا وانە،هەروەسا هەکە عێراقیان ڤیا بكه‌نه دو یان سێ پارچه مالا وانە،د.موسه‌نای گوت ژی،ئەب عێراقێ ژ عێراقیان ناپارێزم ئه‌وێن وێ ره‌خنا سووندێ ل من دگرن،ئەو ب خۆ پاشكۆیێن ده‌ولەتێن بیانی و ده‌ره‌كینە.
د.موسه‌نای دیارکریە کو،عێراقی ب خوە پابه‌ند نه‌بووینە ب سووندا دستوری و گوت ژی بۆ عێراقیان سیستەمێ فیدرالی و دیموكراتی یێ پاراستیه،لێ عێراق ب خوە یا بوویە دارده‌ستێ وەلاتێن بیانی.
ناڤهاتی گوت ژی، نابیت سه‌ربه‌خۆیی جهێ ئاخفتنێ بیت، چونکی دەربرینێ ژ كه‌رامه‌تا ملله‌تەکێ د‌كەت،به‌لێ مه باوەریەکا ته‌مام هه‌یه كو تاكه چاره‌سه‌ری و ئیستیحقاقا كوردان سه‌ربه‌خۆیی یه،به‌لێ هەتا وی دەمێ پشکەک بین ژ ڤێ جوگرافیێ و ڤێ ده‌ولەتێ پێدڤیه ئەم نوونه‌رهێن ب هێز یێن خوە ڤرێکەینە به‌غدا،داکو به‌رگریێ ژ كه‌رامه‌ت و مافێ مە بكەن.
راگه‌هاند ژی ڤەگەریانا مه بۆ به‌غدا یا هندێ یە کو،ئەم نه‌شیاینه سه‌ربه‌خۆ بین،هەکە رۆژەکێ ژی ئەم نە دماینە ل بەغدا،نوکە ژی کو مافێن مە ل به‌غدانە دڤێتت ئەم بچینه به‌غدا و پارێزگاریێ ل مافێن گەلێ کوردستانێ بكه‌ین.