دھۆک: ئەڤ سالە 50 کەسان ب روودانێن ھاتنوچوونێ گیانێ خوە ژ دەست دایە
ئەڤرۆ نيوز:
ب گۆرەی ئامارەکا رێڤەبەریا پۆلیسێن ھاتنوچوونا دھۆکێ، ژ دەسپێکا ئەڤ سالە 428 روودانێن ھاتنوچوونێ رووداینە و ژ ئەگەرێ وان روودانان 50 کەسان گیانێ خوە ژ دەست دایە.
موقەدمێ ھاتنوچوونێ ئازاد تاھا، بەرپرسێ راگەھاندنا ھاتنوچوونا پارێزگەھا دھۆکێ، د کۆنگرەکێ رۆژنامەڤانی دا ئامارێن ئەڤ سالە یێن رێڤەبەریا ھاتنوچوونا پارێزگەھا دھۆکێ ل گەل پلانا رێڤەبەریا وان بۆ رۆژانێن جەژنێ راگەھاند.
موقەدم ئازاد گۆت: “ژ دەسپێکا ئەڤ سالە و ھەتا نھا 428 روودانێن ھاتنوچوونێ ل پارێزگەھا دھۆکێ رووداینە و ژ ئەنجامێ وان روودانان 50 کەسان گیانێ خوە ژ دەست دایە و 430 وەلاتی ژی بریندار بووینە”.
ب گۆرەی ئامارێن بەرپرسێ راگەھاندنێ ل رێڤەبەریا ھاتنوچوونا پارێزگەھا دھۆکێ ل ھەیڤا رەمەزانێ ب تنێ 134 روودانێن ھاتنوچوونێ رووداینە و ژ ئەگەرێ وان روودانان ژی 14 کەسان گیانێ خوە ژ دەست دایە و 54 وەلاتی ژی بریندار بووینە.
