دھۆک بۆ ڤان دو تشتان ل رێزا ئێکێ دھێت
ئەڤرۆ نیوز:
شاندەکێ وەزارەتا کارەبێ دوھی 18-11-2015 سەرەدانا پارێزگەھا دھۆکێ و ئەنجومەنێ پارێزگەھا دھۆکێ کر و ژ ئالیێ پارێزگارێ دھۆکێ ب وەکالەت و سەرۆکێ ئەنجومەنی و جێگر و ئەندامێن ئەنجومەنی ڤە ھاتە پێشوازیکرن و پشتی روونشتنەکێ پرێس کۆنفرانسەک ل گەل پارێزگارێ دھوکێ ب وەکالەت ساز کر، ھەروەسا د روونشتنەکێ دا ل ئەنجومەنێ پارێزگەھێ سەرۆکێ ئەنجومەنی رەوشا دھۆکێ ب گشتی و یا کارەبێ ب تایبەتی بۆ وەزیری شرۆڤە کر.
بەھزاد عەلی ئادەم پارێزگارێ دھۆکێ ب وەکالەت دیار کر کو رەوشا پارێزگەھا دھۆکێ پێدڤی پێتر پشتەڤانی و ھاریکاریێ یە د بیاڤێ کارەبێ دا ژلایێ حوکمەتا ھەرێمێ ڤە، چونکی نوکە 23 کەمپێن ئاواران و پەنابەران ل دھۆکێ ھەنە و رۆژانە کارەبەکا مەزن لێ دھێتە مەزاختن و گۆت “دھۆک دو جار ھندی بەری نوکە لێھاتیە”.
سەلاحەدین بابەکر وەزیرێ کارەبا ھەرێما کوردستانێ دیار کر کو ئارمانجا سەرەدانا وان ئەوە کو ژ نێزیک ھایداری پێدڤی و کێم و کاسیێن کەرتێ کارەبێ بیت، ھەروەسا دانانا بەرێ بنیاتی بۆ پرۆژێ ستراتیژیێ ھایدروپاوەرێ دیرەلۆکێ ل گەلیێ رەشاڤا و جارا ئێکێ یە پشتی پروژێ دوکان و دەربەندیخان پرۆژەکی ب ڤی رەنگی ل ھەرێما کوردستانێ دھێتە دانان و دێ ب قەرێ ژاپونی ب رێکا ئاژانسا جایکا ھێتە بجھئینان و بریارە 37 مێگاواتێن کارەبێ بەرھەم بینیت و برێکا ئاڤێ دێ کار کەت و ژ لایێ ئابووری ڤە گەلەک یێ گرنگە و گۆت “قەرەبووکرنا جۆتیارێن زەڤیێن وان دکەڤنە بۆ پرۆژێ ھایدرو پاوەرێ گەلیێ رەشاڤە دێ ژ قەرێ ژاپونێ ھێنە دان”.
ھەر دوھی وەزیرێ کارەبا ھەرێما کوردستانێ و شاندێ دگەل دا سەرەدانا ئەنجومەنێ پارێزگەھا دھۆکێ کر و د روونشتنەکێ دا فەھیم عەبدولا حەمۆ سەرۆکێ ئەنجومەنێ پارێزگەھا دھۆکێ بەحسێ رەوشا پارێزگەھا دھۆکێ کر کو بەری روودانێن شنگالێ ژی دھۆک د بن بارەکێ گران ڤە بوو و ھەست دکەن کو غەدر ل دھۆکێ ھاتیەکرن و ب خۆرایی وەنابێژن، بەلکو ب ژمارە دئاخڤن و گۆت “راستە دەڤەرێن شنگال و دەڤەرێن دەشتا مووسلێ، حەمدانیێ، باشیکێ و بەحزانێ ژ ئالیێ ئیداری ڤە نە ب سەر دھۆکێ ڤەنە، لێ ژ ئالیێ خزمەتگوزاریان ڤە بارەکێ گران ئێخستیە سەر دھۆکێ و دشێم بێژم 70% بارگرانیا وان دەڤەران کەفتینە سەر دھۆکێ”.
سەرۆکێ ئەنجومەنی گۆت ژی “ئەم دزانین قەیران یا سەرانسەری ھەرێما کوردستانێ یە و مە چ داخوازیێن مەحال نینن بێخینە ھەمبەری حوکمەتێ، لێ وەلاتیان خزمەتگوزاری دڤێن و رەنگە کارەب ژ خزمەتگوزاریێن ھەرە سەرەکی بیت، لەورا ژی ئەم ھەست ب غەدرەکا مەزن دکەین میلاکات و پرۆژێن سترایژی و وەبەرھێنانێ و ..ھتد”.
فەھیم عەبدولا حەمۆ خویا ژی کر کو بلا ھەر سێ ئەنجومەن و ھەرسێ پارێزگار ل گەل ئێک ب روونە خوارێ و بلا ب ژمارە باخڤن، دا بزانن کیژان یا مەغدورە، راستە کوردستان ھەمی ئێکە و چ جوداھی نینە، لێ ھەتا د قوربانیدانێ دا ئەز باوەرم دھۆکێ پتر قوربانی داینە، لێ ب تنێ دھۆک ھەژاریێ و بێکاریێ ل پلا ئێکێ دھێت”.
ئەبو بەکر عه‌لى وەزیرێ کارەبێ ل دۆر کێم و کاسیێن دھۆکێ دیار کر کو میلاکات نھا نە د دەستێ وەزارەتان دانە، بەلکو سەر ب ئەنجومەنێ وەزیران ڤەنە، لێ ئەڤە وێ رامانێ نادەت کو چ بۆ دھۆکێ چ نە ھێتەکرن، چونکی ئیستسنائات ھەنە، لەورا پێدڤیە سەرۆکێ حوکمەتێ ئیستسنائێ بدەتە دھۆکێ، چونکی مەحالە دھۆک بشێت ل سەر ڤێ بارگرانیێ رەوشێ برێڤە ببەت و گۆت “ئەو تشتێ تابعێ مە بیت ئەم دێ کەین و ئەو تشتێ تابعێ ئەنجومەنێ وەزیران بیت ئەم ژی دێ پشتەڤان بین و دێ گەھینینە ئەنجومەنی، ھیڤی دکەین کو زۆر چوو بیت و کێم مابیت”.
ژ ئالیەکێ دن ڤە وەزیرێ کارەبێ گۆت “خۆشحال بووین کو حوکمەتا خۆجھی ل دھۆکێ دروست بوویە و ئەڤە قووناغەکا نوویە و حەز دکەین ئالیێن دی ژی پشکدار ببن و بوویە جھێ خۆشحالیا ھەمی ئالیان”.
ل دۆر حوکمەتا خۆجھی سەرۆکێ ئەنجومەنێ پارێزگەھا دھۆکێ دیار کر کو ھەکە نە ژبەر ڤان قەیرانان با، دا زووتر ئەڤ پێنگاڤە ھێتە ھاڤێتن و گۆت “ئەم گەش بینین کو ئەڤ حوکمەتە دێ سەرکەڤیت و ئەڤە نابیتە دووماھی قووناغ، لێ ئەڤە گرێدایی رەوشا سیاسی یە کا دێ بەرەف چ ئاقار چیت”.
