دیندار زێباری:پێشمەرگەی پێکڤەژیانەکا ئارام بۆ ھەموو پێکھاتەیێن ئاینی و نەتەوی په‌يدا كربوو
ئەڤرۆ نیوز، نەوزاد ھلۆری:
دچارچوڤێ کونگرا ئارامی و پێکڤەژیانێ ل نەینەوا کە ل دھوکێ برێڤەدچیت ، دیندار زێباری سەروکێ فەرمانگەھا بەرسڤدانا راپۆرتێن نیڤدەولەتی ل جڤاتا وه‌زيران دیارکر کو ھێزێن پێشمەرگەی رۆلەکێ کارا د رزگارکرنا مووسلێ دا ھەبوویە و ل سایا پێشمەرگەی پێکڤەژیانا ئولی و نەتەوی ل دەڤەرێ درۆستبوویە.
دیندار زێباری گۆت ژی” پێشمەرگەی رۆلەکێ بەرچاڤ ھەبوویە د پەیداکرنا ئارامی و سەقامگیریێ ل دەڤەرێن ڤەقەتیایی و ل سایا ھێزێن پێشمەرگەی پێکڤەژیانەکا ئارام بۆ ھەموو پێکھاتەیێن ئاینی و نەتەوی ل وان دەڤەران پەیدابوویە، و ل ھەرێما کوردستانێ زێدەتری ملیۆنەک ئاوارە و پەنابەر ھاتینە ڤەحەواندن و ٤١ ھزار خیڤەت ھاتینە دانان و ژ وان ئاوارەیان ژبەر شەر و ئالوزیێن عیراقێ زێدەتری ٦٠٠ ھزار ئاوارێن عیراقێ ل ھەرێما کوردستانێ ھاتینە ئاکنجیکرن و ب ئارامی دژین و ھەرێما کوردستانێ بێی جوداھیا ئولی و نەتەوی خزمەتێ بۆ وان دکەت”.
زێدەتر گۆت” داخوازێ ژ جڤاکێ نیڤدەولەتی دکەین کو مل ب ملێ حوکمەتا ھەرێما کوردستانێ دخزمەتکرنا ئاوارە و پەنابەران و پەیداکرنا ئارامی و سەقامگیریەکا باش بۆ ئاوارە و پەنابەران و خەلکێ دەڤەرێ بکەت و پێدڤیە بۆ دووبارە زڤراندنا ئارامیەکا باش مادێ ١٤٠ بھێتە کاراکرن و ھێزێن پێشمەرگەی کو پشکەکە ژ سيسته‌مێ بەرگرياعیراقێ، پاراستنا وان دەڤەران بکەت”.
ديندار زێبارى دیارکر ژی کو پێدڤیە ب زووترین دەم مووسل و دەڤەرێن رزگارکری بھێنە ئاڤەدانکرن داکو جارەكا دى دووبارە خەلکی وان دەڤەران بزڤرن سەر مال و حالێن خوە و دەست ب ژیانەکا نوو بکەن و گۆت ” بۆ رزگارکرنا کوردێن ئێزدی حوکمەتا ھەرێما کوردستانێ بزاڤێن مه‌زن کرینە و دیسان ھەموو بزاڤ دھێنەکرن بۆ زڤراندن و ڤەگەراندنا وان وەلاتیێن ئێزدیێن کو ھەتا نھا د دەستێ داعش دا ماين و نەھاتینە زڤراندن ، دیسان بزاڤێن خورت دھێنە كرن بۆ کۆمکرنا بەلگە و دیدەڤانان داکو ب زووترین دەم کارەسات و کۆمکوژیێن ب سەرێ ئێزدیان ھاتی ل دادگەھا لاھای ب جینوساید بھێتە نیاسین”.
ب گۆرەی ئاحفتنێن زێباری ل سایا ھەند ھێزێن عیراقی ، چەند تاوانکاری و قوربانی ل مووسلێ ھاتینەکرن و پێدڤیە ئەو کەس و لایەن بھێنە سزادان.
دھێتە زانین کو کونفرانسێ ئارامی و پێکڤە ژیان دێ بۆ دەمێ سێ رۆژان یێ بەردەوام بیت و تێدا ھەموو ئەنجام و پێشنیارێن کونفرانسی بۆ لایەنێن شولەژێ ھێتە بلندکرن داکو د ئاڤەدانکرنا مووسلێ دا مفا ژێ بھێتە وەرگرتن.