ئه‌ڤ ساله ژى بهايێ كارتێن مۆبايلان ناهێته كێمكرن
ئەڤرۆ نيوز:
ئەندامەکێ لیژنا دارایی و ئابووری ل پەرلەمانێ عیراقێ راگەھاند، ل سالا بۆری ھەیڤا ھەشت بریار ھاتبوو دان کو بھایێ کارتێن مۆبایلان یێن ھەر سێ ھێلێن سەرەکی یێن عیراقێ کورەک، ئاسیا و زێن باج بکەڤیتە سەر و ھەر کارتەکێ ھزار دینار بھا گرانتر لێ بھێت و بۆ ئەڤ سالە ژی ب ھەمان شێوەیە.
حاکم سەرحان سلێڤانەیی ئەندامێ لیژنا دارایی و ئابووری ل پەرلەمانێ عیراقێ بۆ ئه‌ڤرۆ نيوز دیار کر، دەمێ ل سالا بۆری ئەو بریار و قانوونە دەرچووی، یا بەروەخت بوو و ب تنێ بۆ چار ھەیڤان، ئانکو ھەتا دووماھیا سالا(2015)، بەلێ ئەڤ سالە ژ بەر دووبارە تێکچوونا رەوشا دارایی و ئابووری ل عیراقێ، دیسا ئەو قانوونە دووبارە نوو بووڤە و ئەڤ سالە ھەمیێ دێ ب ھەمان بریار کار ل سەر ھێتە کرن.
ئەندامێ لیژنا دارایی و ئابووری ل پەرلەمانێ عیراقێ خویا ژی کر کو کارتێن پێنچ ھزار بووینە شەش ھزار و یێن 10 ھزار بووینە 12 ھزار و ئەو پارێ زێدە ژ بکرێن کارتان دھێتە وەرگرتن بۆ حوکمەتێ وەکو باج ڤەدگەریت، ھەروەسا ژ پارێ پێنچ ھزاری یا کۆمپانیێن گەھاندنێ ژی ھزار دینار وەکو باج دھێتە بریِن و دیسا ئەو ژی بۆ حوکمەتێ ڤەدگەڕیت.
ئاشکرا ژی کر، ھندی پترۆل ھوسا ئەرزان بھێتە فرۆتن و رەوشا ئابووری یا عیراقێ یا تێکچووی بیت، رەنگە ئەڤ باجە ھەر ل سەر فرۆتنا کارتێن مۆبایلان ھەبیت و ھەتا دووماھیا ئەڤ سالە دێ یا بەردەوام بیت و گۆت “ھەکە رەوش ئارام بوو، رەنگە ل سالا نوو بریارەکا نوو دەربچیت و کار پێ بھێتە کرن”.
